ތަޢުލީމީ ވުޒާރާއިން 2027 ވަނަ އަހަރުގެ ވަގުތީ ދިރާސީ ކަލަންޑަރު އާންމުކޮށްފި

ޖެނުއަރީ 17 ގައި ދިރާސީ އައު އަހަރުގެ ކިޔެވުން ފެށި ޑިސެމްބަރު ނުވައެއްގައި ނިމޭ ގޮތަށް 2027 ވަނަ އަހަރަށް ކަނޑައެޅި ވަގުތީ ދިރާސީ ކަލަންޑަރު ތަޢުލީމީ ވުޒާރާއިން މިއަދު އިޢުލާނުކޮށްފިއެވެ.

އެ ކަލަންޑަރުގައިވާ ގޮތުން ދިރާސީ އަހަރު ހިނގާނީ ޖުމްލަ 201 ދުވަހުގެ މައްޗަށެވެ. އޭގެ ތެރެއިން ކިޔަވައިދިނުމަށް 163 ދުވަސް ހަމަޖައްސާފައިވާ އިރު، އިމްތިޙާނުތަކަށް 16 ދުވަހާއި ރިޕޯޓު ތައްޔާރުކުރުމަށް 10 ދުވަސް ޚާއްޞަކޮށްފައިވެއެވެ. މުދައްރިސުންގެ ފަންނީ ތަރައްޤީއަށް ހަތް ދުވަހާއި ކިޔަވައިނުދޭ ފަސް ދުވަސް ވެސް އެ ކަލަންޑަރުގައި ހިމެނެއެވެ. މަތީ ސާނަވީގެ ކިޔެވުން ފެށުމަށް ތާވަލުކޮށްފައި ވަނީ ޖެނުއަރީ 31 އަށެވެ.

ފުރަތަމަ ޓާމުގައި 114 ސްކޫލު ދުވަސް ހިމެނޭ އިރު، އެ ޓާމު ނިމޭ ތާރީޚަކީ ޖުލައި 15 އެވެ. ފުރަތަމަ ޓާމުގެ މެދު ޗުއްޓީ ކުރިއަށް ދާނީ މެއި 16 އިން 22 އަށެވެ. އަދި އެ ޓާމުގެ އިމްތިޙާނު ބޭއްވުމަށް ރާވާފައި ވަނީ ޖޫން 29 އިން ޖުލައި 10 އަށެވެ. ދެވަނަ ޓާމު ކުރިއަށް ދާނީ އޮގަސްޓް އެކަކުން ޑިސެމްބަރު ނުވައެއްގެ ނިޔަލަށެވެ. އެ ޓާމުގައި 87 ސްކޫލު ދުވަސް ހިމެނޭ އިރު، މެދު ޗުއްޓީ ލިބެނީ ސެޕްޓެމްބަރު 19 އިން 25 އަށެވެ. ދެވަނަ ޓާމުގެ އިމްތިޙާނު އޮންނާނީ ނޮވެމްބަރު 23 އިން ޑިސެމްބަރު ހަތަރެއްގެ ނިޔަލަށެވެ.

ގުރޭޑް 10 އާއި ގުރޭޑް 12 ގެ ދަރިވަރުންގެ މޮކް އިމްތިޙާނު ތާވަލުކޮށްފައި ވަނީ އޮގަސްޓް 26 އިން ސެޕްޓެމްބަރު ނުވައެއްގެ ނިޔަލަށެވެ. ސާނަވީ އާއި މަތީ ސާނަވީ ނިންމާ އިމްތިޙާނު ބޭއްވުމަށް ހަމަޖެހިފައި ވަނީ އޮކްޓޫބަރު / ނޮވެމްބަރުގައެވެ. ގުރޭޑް 11 ގެ އެޗްއެސްސީ އާއި އެޑެކްސެލް އޭއެސް އިމްތިޙާނު ކުރިއަށް ގެންދިޔުމަށް ރާވާފައި ވަނީ މެއި / ޖޫންގައެވެ.