ދީނާ ޚިލާފު ޤާނޫނެއް ނުހެދޭނެ އޮނިގަނޑެއް މަޖިލީހަށް ހުށަހަޅުއްވާނެ ކަމަށް ރައީސް ވިދާޅުވެއްޖެ
ޤައުމީ ދުވަހާ ގުޅިގެން ހއ. އުތީމުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ދީނާ ޚިލާފު ޤާނޫނެއް ނުހެދޭނެ ކަމަށް ޤާނޫނުއަސާސީގައި ލިޔެފައި އޮތް ނަމަވެސް އެ އުސޫލު ޢަމަލީ ގޮތުން ތަންފީޒުކުރެވޭނެ ހަރުދަނާ ނިޒާމީ އޮނިގަނޑެއް މިހާތަނަށް ޤާއިމުވެފައި ނެތް ކަމަށެވެ. އެ މައްސަލައަށް ނިމުމެއް ގެނެސް އުސޫލީ ގޮތުންނާއި ނިޒާމީ ގޮތުން ދީނާ ފުށުއަރާ ޤާނޫނެއް އުފަންވިޔަ ނުދޭނެ ގޮތް ހެއްދެވުމަށް ނިންމަވާފައިވާ ކަމަށް އެ މަނިކުފާނު ވިދާޅުވިއެވެ.
އިސްލާމްދީނުގެ އަސާސްތަކާ ފުށުއަރާ ޤާނޫނެއް ރާއްޖޭގައި ނުހެދޭނެކަން ކަށަވަރުކުރުމަށް ނިޒާމީ އޮނިގަނޑެއް އެކުލަވައިލައި ރައްޔިތުންގެ މަޖިލީހުގެ މި އަހަރުގެ ތިންވަނަ ދައުރަށް ހުށަހަޅުއްވާނެ ކަމަށް ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ޤައުމީ ދުވަހާ ގުޅިގެން ހއ. އުތީމުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ދީނާ ޚިލާފު ޤާނޫނެއް ނުހެދޭނެ ކަމަށް ޤާނޫނުއަސާސީގައި ލިޔެފައި އޮތް ނަމަވެސް އެ އުސޫލު ޢަމަލީ ގޮތުން ތަންފީޒުކުރެވޭނެ ހަރުދަނާ ނިޒާމީ އޮނިގަނޑެއް މިހާތަނަށް ޤާއިމުވެފައި ނެތް ކަމަށެވެ. އެ މައްސަލައަށް ނިމުމެއް ގެނެސް އުސޫލީ ގޮތުންނާއި ނިޒާމީ ގޮތުން ދީނާ ފުށުއަރާ ޤާނޫނެއް އުފަންވިޔަ ނުދޭނެ ގޮތް ހެއްދެވުމަށް ނިންމަވާފައިވާ ކަމަށް އެ މަނިކުފާނު ވިދާޅުވިއެވެ.
"އެފަދަ ނިޒާމެއް ގާއިމް ކުރުމަށް ރައްޔިތުންގެ މަޖިލީހުގެ މި އަހަރުގެ ތިންވަނަ ދައުރަށް އިރާދަކުރެއްވިއްޔާ ހުށަހަޅާނެ ކަމުގެ ފުރިހަމަ ޔަގީންކަން ރާއްޖޭގެ ހުރިހާ ރައްޔިތުންނަށް މިއަދު އަޅުގަނޑު އަރުވަން" ރައީސް ވިދާޅުވިއެވެ.
ދީނާ ބީރައްޓެހި ސިޔާސަތުތައް ތަންފީޒުކުރި ކޮންމެ ދަނޑިވަޅެއްގައި ރާއްޖޭގެ މިނިވަންކަމަށް ބުރޫއަރާފައިވާކަން ފާހަގަކުރައްވައި ޕޯޗުގީޒުންގެ އަޅުވެތިކަމަށް ރާއްޖެ ވެއްޓުނީ އެންމެ މީހަކު ދީން ދޫކޮށްލުމުން ކަމަށް ރައީސް ވިދާޅުވިއެވެ.
"އިސްލާމް ދީނާ ބީރައްޓެހި ނުވަތަ އިސްލާމްދީނާ ދުރު ސިޔާސަތުތައް ތަންފީޒުކުރާ ކޮންމެ ފަހަރަކު ދިވެހި ގައުމުގެ މިނިވަންކަން އޮތީ ގެއްލިފައި. ނުވަތަ ދިވެހިރާއްޖޭގެ މިނިވަންކަން ވަނީ ނުރައްކަލުގެ ތުންފަތްމައްޗަށް ވެއްޓިފައި" އެ މަނިކުފާނު ވިދާޅުވިއެވެ.
މީގެ އިތުރުން ޤައުމީ ބަޠަލުގެ ޙަޔާތްޕުޅުންނާއި ދީނުގެ އުނގަންނައިދެއްވުންތަކުން ފެންނަ އެންމެ ވަރުގަދަ ބިންގަލަކީ ރިވެތި އަޚްލާޤު ކަމަށް ރައީސް ވިދާޅުވިއެވެ. އެއާ އެކު ޤާނޫނާއި ގަވާއިދަށް ބޯލެނބުމާއި އެކަކު އަނެކަކަށް ޤަދަރާއި އިޙްތިރާމް އަދާކުރާ ތަހުޒީބު މުޖުތަމަޢެއް ބިނާކުރުމުގެ ޢަޒުމު ކަނޑައެޅުމަށް ރައީސް އިލްތިމާސްކުރެއްވިއެވެ.
ޤާނޫނުއަސާސީގެ 10 ވަނަ މާއްދާގައި ދިވެހި ދައުލަތުގެ ދީނަކީ އިސްލާމްދީން ކަމަށާއި އިސްލާމްދީނަކީ ރާއްޖޭގެ ޤާނޫނުގެ މައިގަނޑު މަޞްދަރު ކަމަށް ކަނޑައަޅާފައިވާ އިރު ދީނުގެ އަޞްލަކާ ޚިލާފު ޤާނޫނެއް ނުހެދޭނެ ކަމަށް ވެސް އެ މާއްދާގައި ބަޔާންކޮށްފައިވެއެވެ.
ލިޔުންތެރިޔާ
އަހުމަދު އާހިލް ސައީދު
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
