ނޭޕާލުގެ ދެ މީހަކު ދިރުވާލައިގެން 1.5 ކިލޯގެ މަސްތުވާތަކެތި އެތެރެކޮށްފި

ހަށިގަނޑުގައި ފޮރުވައިގެން ރާއްޖެއަށް މަސްތުވާތަކެތި އެތެރެކުރި ކަމުގެ ތުހުމަތުގައި ނޭޕާލަށް ނިސްބަތްވާ ދެ މީހަކު ހައްޔަރުކޮށް، އެ މީހުންގެ ހަށިގަނޑުން 1.5 ކިލޯއަށްވުރެ ގިނަ މަސްތުވާތަކެތި ފެނިއްޖެއެވެ.

ހައްޔަރުކޮށްފައިވަނީ އުމުރުން 47 އަހަރުގެ ނިއްކަ ތަމަންގް އަދި 40 އަހަރުގެ އީތްރާނީ ގަލެ އެވެ. މި ދެ މީހުން ރާއްޖެ އައި އިރު ހަށިގަނޑުގައި މަސްތުވާތަކެތި ރައްކާކޮށްފައިވާ ކަމަށް ޝައްކުކުރެވިގެން ކަސްޓަމްސް އިން ހިފެހެއްޓުމަށް ފަހު ފުލުހުންނާ ހަވާލުކުރީއެވެ. ފުލުހުންގެ ޑްރަގް އެންފޯސްމަންޓުން އެ ދެ މީހުން ރަސްމީކޮށް ހައްޔަރުކޮށްފައިވަނީ މި މަހުގެ 25 ވަނަ ދުވަހުއެވެ.

އެ ދެ މީހުން ބަލައި ފާސްކުރި އިރު ހަށިގަނޑުގެ ތެރެއިން މަސްތުވާތަކެތި ކަމަށް ބެލެވޭ އެއްޗެއް އަޅާފައިވާ 142 ބުލެޓް ފެނިފައިވާ ކަމަށް ފުލުހުން ބުނެއެވެ. އެ ތަކެތީގެ ވަގުތީ ބަރުދަނުގައި 1.5 ކިލޯއަށްވުރެ ގިނައިން ހުރި ކަމަށް ވެސް ފުލުހުން ބުނެއެވެ. މި ދެ މީހުންގެ މައްޗަށް ތުހުމަތުކުރެވެނީ ހަށިގަނޑުގައި ފޮރުވައިގެން ރާއްޖެއަށް މަސްތުވާތަކެތި ސްމަގަލްކޮށް ޓްރެފިކްކުރުމުގެ ކުށެވެ.

ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ވަނީ ދެ މީހުންގެ ބަންދަށް 30 ދުވަހުގެ މުއްދަތެއް ޖަހައިފައެވެ.