ވަތަނީ ޚިދުމަތުގެ ފަންނީ ތަމްރީނުގެ ދެވަނަ ބުރުން 73 ޒުވާނަކު ދަސްވެނިވެއްޖެ

17 އަތޮޅަކުން ބައިވެރިވި ޒުވާނުންގެ ތެރެއިން 73 ދަރިވަރަކު ދިވެހި ވަތަނީ ޚިދުމަތުގެ ފަންނީ ތަމްރީނު ޕްރޮގްރާމުގެ ދެވަނަ ބެޗު ފުރިހަމަކޮށް މިއަދު ދަސްވެނިވެއްޖެއެވެ.

މި ބެޗުގެ ކިޔެވުން ފެށީ މި އަހަރުގެ ޖޫން ތިނެއްގައި ކަމަށްވާ އިރު، 16 ހަފުތާގެ މި ތަމްރީނުގައި ޖުމްލަ 75 ދަރިވަރުން ބައިވެރިވެފައިވެއެވެ. ތަމްރީނު ފުރިހަމަކުރި 73 ދަރިވަރުންގެ ތެރޭގައި ހިމެނެނީ 60 ފިރިހެން ކުދިންނާއި 13 އަންހެން ކުދިންނެވެ. ނޭޝަނަލް ސާވިސް އިނީޝިއަލް ޓްރެއިނިން ނިންމާ ދަރިވަރުންނަށް ޚާއްޞަކޮށްގެން ހިންގާ މި ޕްރޮގްރާމުގައި ކިޔަވައިދެނީ ތަފާތު ފަންނީ ދާއިރާތަކުގެ ތަޖުރިބާ ލިބިފައިވާ ސިފައިންގެ އިންސްޓްރަކްޓަރުންނެވެ.

ތަމްރީނުގައި އުނގަންނައިދީފައިވާ ދާއިރާތަކުގެ ތެރޭގައި އޮޓޯ މޯބައިލް އިންޖިނިއަރިން، މެރިން އިންޖިނިއަރިން، އިލެކްޓްރީޝަން، ރެފްރިޖެރޭޝަން އެންޑް އެއާ ކޮންޑިޝަން، ވެލްޑިން، މެޓަލް ފެބްރިކޭޝަން އަދި އޮފީސް މެނޭޖުމަންޓު ހިމެނެއެވެ. މި ޕްރޮގްރާމް ނިންމާ ދަރިވަރުންނަށް މޯލްޑިވްސް ކޮލިފިކޭޝަން އޮތޯރިޓީން ޤަބޫލުކުރާ ލެވެލް ތިނެއްގެ ސެޓިފިކެޓެއް ލިބެއެވެ.

ފަންނީ ތަމްރީނުގެ ފުރަތަމަ ދެ ބެޗުން ނުވަ މަސް ދުވަހުގެ ތެރޭގައި ޖުމްލަ 136 ޒުވާނަކު ދަސްވެނިވެފައިވާ އިރު، ތިންވަނަ ބެޗުގެ ތަމްރީނުތައް މި މަހުގެ 12 ވަނަ ދުވަހު ފެށުމަށް ވަނީ ހަމަޖެހިފައެވެ. ވަތަނީ ޚިދުމަތުގެ ޕްރޮގްރާމަށް އައު ފަންނީ ދާއިރާތައް ތަޢާރަފުކޮށް، ނޭޝަނަލް ސާވިސްގެ އިންޓާންޝިޕް ޕްރޮގްރާމުތައް ވެސް ތަޢާރަފުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ.

ދިވެހި ވަތަނީ ޚިދުމަތަކީ ޒުވާނުންގެ ކިބައިގައި ޤައުމީ ރޫޙާއި އިސްލާމީ އަޚްލާޤު އާލާކޮށް، ޤައުމަށް ޚިދުމަތް ކުރުމުގެ ޖޯޝު ހުރި ޖީލެއް ބިނާކުރެއްވުމަށް ރައީސް ޑރ. މުޢިއްޒު ފެއްޓެވި ޕްރޮގްރާމެކެވެ. މި ޕްރޮގްރާމުގެ ދަށުން މިހާތަނަށް ތިން ބެޗެއްގެ ތަމްރީނުތައް 1,000 އަށް ވުރެ ގިނަ ދަރިވަރުން ފުރިހަމަކޮށްފައިވެއެވެ.