ރައްޔިތުންގެ މަޖިލީހުގެ ތިންވަނަ ދައުރުގެ ޖަލްސާތައް އަންނަ ހޯމަ ދުވަހު ފެށުމަށް ތާވަލުކޮށްފި

ޗުއްޓީގައި އޮތް ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރުގެ ޖަލްސާތައް އަންނަ ހޯމަ ދުވަހު ފެށުމަށް ނިންމައިފިއެވެ.

މަޖިލީހުން ޢާންމުކޮށްފައިވާ އެޖެންޑާގައިވާ ގޮތުން ތިންވަނަ ދައުރުގެ ފުރަތަމަ ޖަލްސާގައި މަޖިލީހުގެ ރައީސްގެ މޭޒުން ދެ ކަމެއް ހުށަހެޅުމަށް ވަނީ ހަމަޖެހިފައެވެ. އެއީ މީރާގެ ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ބޭފުޅަކު ޢައްޔަނުކުރެއްވުމަށް ރައީސުލްޖުމްހޫރިއްޔާ ފޮނުއްވާފައިވާ މައްސަލައާއި، "މައްކަތުލް މުކައްރަމާ ކޮންވެންޝަން އޮފް ދަ މެންބަރ ސްޓޭޓްސް އޮފް ދަ އޯގަނައިޒޭޝަން އޮފް އިސްލާމިކް ކޯޕަރޭޝަން އޮން އެންޓި-ކޮރަޕްޝަން ލޯ އެންފޯސްމަންޓް ކޯޕަރޭޝަން" މުޢާހަދާގައި ބައިވެރިވުމާ ގުޅޭ ގޮތުން މަޖިލީހުގެ ރުހުން ހޯދުމަށް ރައީސުލްޖުމްހޫރިއްޔާ ހުށަހަޅުއްވާފައިވާ މައްސަލައެވެ.

މީގެ އިތުރުން ސަރުކާރުގެ ފަރާތުން ހުށަހަޅާފައިވާ ކުށްކޮށްގެން ހޯދާ މުދަލާ ގުޅޭ ބިލުގެ އިބްތިދާޢީ ބަހުސް ވެސް އެ ޖަލްސާގައި ކުރިއަށް ގެންދިޔުމަށް ވަނީ ތާވަލުކޮށްފައެވެ.

މަޖިލީހުގެ ޤަވާއިދުގައިވާ ގޮތުން ކޮންމެ އަހަރެއްގެ ޖަލްސާތައް ތިން ދައުރަކަށް ބަހައިލައިގެން ކުރިއަށް ގެންދެއެވެ. ފުރަތަމަ ދައުރު ހިނގާނީ ފެބްރުއަރީ އެކަކުން މެއި 15 އަށެވެ. ދެވަނަ ދައުރު ޖޫން އެކަކުން އޮގަސްޓް 15 އަށެވެ. ތިންވަނަ ދައުރު ކުރިއަށް ދާނީ އޮކްޓޫބަރު އެކަކުން ނޮވެމްބަރު ނިޔަލަށެވެ. ދެވަނަ ދައުރުގެ ޖަލްސާތައް ނިންމައިލައި މަޖިލީސް ޗުއްޓީއަށް ގޮސްފައިވަނީ މިދިޔަ އޮގަސްޓް މަހުގެ 26 ވަނަ ދުވަހުއެވެ.