މޯލްޑިވިއަންގެ ސީޕްލޭން ޓާމިނަލް ޒަމާނީ ފެންވަރަށް ބަދަލުކޮށް ޚިދުމަތް ފަށައިފި

ޤައުމީ އެއާލައިން މޯލްޑިވިއަންގެ ސީޕްލޭން ޓާމިނަލް ޒަމާނީ ވަސީލަތްތަކާ އެކު ތަރައްޤީކޮށް މިއަދު ރަސްމީކޮށް ހުޅުވައިފިއެވެ.

މިއަދު ބޭއްވި ރަސްމިއްޔާތުގައި އެ ޓާމިނަލް ހުޅުވައިދެއްވީ ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީނެވެ.

މޯލްޑިވިއަނުން ބުނީ މިއީ ފަސިންޖަރުންނަށް ދޭ ޚިދުމަތްތައް ހަރުދަނާކޮށް، އޮޕަރޭޝަނަލް ގޮތުން ކަންކަން ހަލުވިކުރުމަށް އެޅުނު މުހިންމު ފިޔަވަޅެއް ކަމަށެވެ. އެ ކުންފުނިން ބުނި ގޮތުގައި މި ބަދަލަކީ ފަތުރުވެރިކަމާއި ވައިގެ ދަތުރުފަތުރުގެ ދާއިރާ އިތުރަށް ފުޅާކުރުމުގެ ގޮތުން ގެނައި ބޮޑު ބަދަލެކެވެ. އަދި ރާއްޖޭގެ ރަށްތަކަށް ދަތުރުކުރާ ފަތުރުވެރީންނަށް ބައިނަލްއަޤުވާމީ ފެންވަރުގެ މަރުޙަބާއެއް ކިޔުމަށް އެ ކުންފުނިން ކުރަމުންދާ މަސައްކަތުގެ ހެއްކެއް ކަމަށް ވެސް މޯލްޑިވިއަނުން ބުނެފައިވެއެވެ.

އައު ޓާމިނަލާ އެކު ސީޕްލޭން ލައުންޖު ކުރީގެ ދެ ގުނައަށް ބޮޑުކޮށްފައިވާ ކަމަށް އެ ކުންފުނިން ބުނެފައިވެއެވެ. އޭގެ އިތުރުން ކުޑަކުދިން ކުޅޭ ސަރަޙައްދަކާއި، ލުއި ކާނާ އާއި ސޮވެނިއާ ލިބޭ ކިއޮސްކެއް ޤާއިމުކޮށްފައިވާ އިރު، މުވައްޒަފުންނަށް ޚާއްޞަ ކެންޓީނެއް ވެސް ވަނީ ހަދައިފައެވެ. ހަމައެއާ އެކު ބޯޑިން ގޭޓުގެ ޢަދަދު އިތުރުކޮށް، ދިވެހި މާޙައުލާ ގުޅޭ ގޮތަށް އައުޓްޑޯ ސަރަޙައްދެއް ލައުންޖުގެ ބައެއްގެ ގޮތުގައި ވަނީ ޤާއިމުކޮށްފައެވެ. މުޅި ޓާމިނަލުގެ އެތެރެ އާއި ބޭރުގެ ޑިޒައިނަށް ވެސް ވަނީ ބޮޑެތި ބަދަލުތަކެއް ގެނެސްފައެވެ.