އެސްއެމްއީ ޑިޖިޓަލްގެ ލޯނުތައް ޝަރީޢާއާ އެއްގޮތަށް ބަދަލުކުރުމަށް އޯޕަންޑޭއެއް ބާއްވަނީ

އެސްއެމްއީ ޑިޖިޓަލް މެދުވެރިކޮށް މިހާތަނަށް ދޫކޮށްފައިވާ ކޮންވެންޝަނަލް ލޯނުތައް އިސްލާމީ ފައިނޭންސިން ފެސިލިޓީތަކަށް ބަދަލުކޮށްދިނުމަށް ޚާއްޞަ އޯޕަންޑޭއެއް މިމަހުގެ 15 ވަނަ ދުވަހު ބާއްވަން ނިންމައިފިއެވެ.

ބީއެމްއެލް އިސްލާމިކް މާލެ ބްރާންޗުގައި ހެނދުނު 9 އިން ހަވީރު 4 އަށް ކުރިއަށް ގެންދާ މި ހަރަކާތުގެ ބޭނުމަކީ ހުރިހާ ކޮންވެންޝަނަލް ލޯނެއް ޝަރީޢާ ކޮމްޕްލަޔަންޓް ފެސިލިޓީތަކަށް ރީފައިނޭންސް ކުރުމުގެ މަރުހަލާ ވަގުތުން ނިންމައިލެވޭނެ އިންތިޒާމު ހަމަޖެއްސުން ކަމަށް އެސްއެމްއީ ޑިޖިޓަލުން ބުނެފައިވެއެވެ. ޝަރުތު ހަމަވާ ފަރާތްތަކަށް މިހާރު ވެސް އެސްއެމްއީ ޕޯޓަލް މެދުވެރިކޮށް ރީފައިނޭންސިން އޮފާތައް ފޮނުވައިފައިވާ ކަމަށް އެ ބޭންކުން ބުނެފައިވެއެވެ.

އެ ދުވަހު ވަޑައިގަންނަވާ ކަސްޓަމަރުންނަށް އެސްއެމްއީ ޑިޖިޓަލްގެ ޓީމުގެ އެހީގައި ލިބިފައިވާ އޮފާތައް ބެލުމާއި އޮފާ ގަބޫލުކުރާ ނަމަ އައު އެއްބަސްވުމުގައި ސޮއިކޮށް ރީފައިނޭންސް ކުރުމުގެ ހުރިހާ ކަމެއް އެ ހަރަކާތުގެ ތެރެއިން ނިންމައިލެވޭނެއެވެ. ރީފައިނޭންސް ކުރުމަށް ވަޑައިގަންނަވާއިރު އައިޑީ ކާޑު ގެންނަންވާނެ ކަމަށް އެ ބޭންކުން ބުނެފައިވެއެވެ.

މި ބަދަލުގެ ސަބަބުން ކަސްޓަމަރުންނަށް ގިނަ ފައިދާތަކެއް ލިބޭނެ ކަމަށް އެސްއެމްއީ ޑިޖިޓަލުން ފާހަގަކޮށްފައިވެއެވެ. އެ ގޮތުން އިސްލާމީ އުސޫލުން އެކުލަވައިލާ އައު ފެސިލިޓީއެއް ލިބުމާއި ފައިސާ އަނބުރާ ދެއްކުމުގެ މުއްދަތު ދިގުވެ މަހު ޕޭމަންޓް ކުޑަވެގެންދާނެ ކަމަށް އެ ބޭންކުން ބުނެފައިވެއެވެ. މީގެ އިތުރުން ޤަވާއިދުން ފައިސާ ދައްކަން ދަތިވެފައި ތިބި ފަރާތްތަކަށް އައު އެއްބަސްވުމުގައި ސޮއިކުރާ ތާރީޚުން ފެށިގެން ހަ މަސް ދުވަހު ޤަވާއިދުން ފައިސާ ދައްކައިގެން ކްރެޑިޓް ރެކޯޑު ރަނގަޅު ކުރެވޭނެ ކަމަށާއި އެއާ އެކު ކުރިމަގުގައި އެ ބޭންކުން އިތުރު ފައިނޭންސިން ހޯދުމުގެ ދޮރު ހުޅުވޭނެ ކަމަށް ވެސް ބުނެފައިވެއެވެ.

އެސްއެމްއީ ޑިޖިޓަލުން ސިފަކުރާ ގޮތުގައި މި ފިޔަވަޅަކީ އެ އިދާރާ ފުރިހަމަ އިސްލާމީ ފައިނޭންސް ފޯރުކޮށްދޭ މާލީ މުއައްސަސާއަކަށް ބަދަލުކުރުމަށް ކުރަމުންދާ މަސައްކަތުގެ މުހިންމު ބައެކެވެ.