ޕީޖީ އޮފީހުގެ އޭއައި އޮނިގަނޑު ބޭނުންވާ ކޮންމެ ޤައުމަކަށް ހިލޭ ދޫކުރަން ނިންމައިފި

ޕްރޮސިކިއުޝަން މަސައްކަތުގައި އާޓިފިޝަލް އިންޓެލިޖެންސް (އޭއައި) ބޭނުންކުރުމަށް ރާއްޖެއިން އެކުލަވައިލި އޮނިގަނޑާއި ތަމްރީނު މަންހަޖު، ބޭނުންވާ ކޮންމެ ޤައުމަކަށް އެއްވެސް އަގެއް ނެތި ފޯރުކޮށްދެއްވާނެ ކަމަށް ޕްރޮސެކިއުޓާ ޖެނެރަލް އަލްއުސްތާޛު ޢައްބާސް ޝަރީފް ވިދާޅުވެއްޖެއެވެ.

ޕީޖީ މިހެން ވިދާޅުވީ އަބޫދާބީގައި ކުރިއަށްދާ އދ. ގެ 15 ވަނަ ކްރައިމް ކޮންގްރެސްގެ އެންސިލަރީ ބައްދަލުވުމުގައި ރާއްޖޭގެ ފަރާތުން ބަޔާން އިއްވަވަމުންނެވެ. އެ ބައްދަލުވުމުގައި ޕީޖީ ވަނީ 2025 ވަނަ އަހަރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނުކުރެއްވި "މޯލްޑިވްސް 2.0" ތަސައްވުރަށް އަލިއަޅުއްވައިލައްވައިފައެވެ. އެ ތަސައްވުރުގެ ދަށުން ޖަޒީރާ ރަށްތަކެއްގެ މައްޗަށް އެކުލެވިގެންވާ ރާއްޖެ ފަދަ ޤައުމެއްގައި ހުރިހާ ރައްޔިތުންނަށް ހަމަހަމައަށް ޚިދުމަތް ފޯރުކޮށްދެވޭނެ ކަމަށް އެމަނިކުފާނު ފާހަގަކުރެއްވިއެވެ.

"ޕީޖީއޯ 2.0" ގެ ނަމުގައި ޕީޖީ އޮފީހުގެ މަސައްކަތްތައް އެއްކޮށް ޑިޖިޓައިޒްކޮށް، ޕްރޮސިކިއުޝަނަށް ޚާއްޞަ އޭއައި ބޭނުންކުރަން ފަށާފައިވާ ކަމަށް ޕީޖީ ވިދާޅުވިއެވެ. "މޯލްޑިވްސް 2.0" ތަސައްވުރަށް ވާޞިލުވި ރާއްޖޭގެ ފުރަތަމަ މުއައްސަސާ އަކީ ޕީޖީ އޮފީސް ކަމަށް ވެސް އެމަނިކުފާނު ވިދާޅުވިއެވެ. ނަމަވެސް ދައުވާ ކުރުމާ ގުޅޭ ނިންމުންތައް ނިންމާނީ ޕްރޮސިކިއުޓަރުން އަމިއްލައަށް ކަމަށާއި، އޭއައި ބެނުންކުރަނީ އެ މީހުންގެ މަސައްކަތަށް އެހީތެރިވާ އެސިސްޓެންޓެއްގެ ގޮތުގައި ކަމަށް ޕީޖީ ހާމަކުރެއްވިއެވެ. ކޯޓަށް މައްސަލައެއް ހުށައަޅާއިރު އޭއައި ބޭނުންކޮށްފައިވާ ނަމަ އެކަން ހާމަވާނެ ކަމަށް ވެސް ވިދާޅުވިއެވެ. "ޕީޖީއޯ 2.0" ގެ މަސައްކަތް 2028 ވަނަ އަހަރުގެ ނިޔަލަށް ނިންމައި، ބޭނުންވާ ޤައުމުތަކަށް އޮނިގަނޑު ހިލޭ ފޯރުކޮށްދެއްވާނެ ކަމަށް ވެސް ޕީޖީ ވިދާޅުވިއެވެ.

މީގެ އިތުރުން މިއަހަރުގެ ފުރަތަމަ ހަ މަސް ދުވަހުގެ ތެރޭގައި ރާއްޖޭގައި ސައިބާ ކުށްތައް ދެ ގުނައަށް އިތުރުވެފައިވާ ކަމަށް ޕީޖީ ފާހަގަކުރެއްވިއެވެ. އެހެން ނަމަވެސް ހެކި ނުލިބުމާއި، މާލީ ހުރަސްތަކާއި، ތުހުމަތުކުރެވޭ ފަރާތް ބޭރު ޤައުމެއްގައި ހުރުން ފަދަ ސަބަބުތަކާ ހެދި ޕީޖީ އޮފީހާ ހަމައަށް ފޮނުވެނީ ނިސްބަތުން މަދު ޢަދަދެއްގެ މައްސަލަ ކަމަށް ވިދާޅުވިއެވެ. މި ދަތިތަކަށް ޙައްލެއް ހޯދުމުގެ ގޮތުން ޤާނޫނުލްއުޤޫބާތާއި ޖިނާޢީ އިޖުރާޢަތުގެ ޤާނޫނާއި ޖިނާޢީ މައްސަލަތަކުގައި ޤާނޫނީ އެހީތެރިކަން ބަދަލުކުރުމުގެ ޤާނޫނު ބުޑަޕެސްޓް ކޮންވެންޝަނާ އެއްގޮތްވާ ގޮތަށް މިއަހަރު އިޞްލާޙުކޮށްފައިވާ ކަމަށް ވެސް ޕީޖީ ވިދާޅުވިއެވެ.