އަންނަ އަހަރުގެ ރޯދަ ހަދިޔާގެ ގޮތުގައި ވެސް ކޮންމެ ގޭބީސީއަކަށް މަސްދަޅު ކޭހެއް ދެނީ

އަންނަ އަހަރުގެ ރަމަޟާން މަހާ ދިމާކޮށް ރޯދަ ހަދިޔާއެއްގެ ގޮތުގައި ހުރިހާ ގޭބީސީއަކަށް މަސްދަޅު ކޭހެއް ދިނުމަށް ރައީސް ޑރ. މުޙައްމަދު މުޢިއްޒު ނިންމަވައިފައިވާ ކަމަށް ލޯކަލް ގަވަމަންޓް މިނިސްޓްރީން މިއަދު ބުނެފިއެވެ.

މިނިސްޓަރު އާދަމް ޝަރީފު ވިދާޅުވި ގޮތުގައި 2026 ވަނަ އަހަރުގެ ފެބްރުއަރީ 18 ގައި ފެށޭ ރޯދަމަހަށް ތައްޔާރުވުމުގެ ގޮތުން ކުރީ ފަހަރެކޭ އެއްފަދައިން ކޮންމެ ގެއަކަށް ވެސް ލިބޭނީ މަސްދަޅު ކޭހެކެވެ. އެ ކަމުގެ ތަފުސީލް މިނިސްޓަރު ހާމަނުކުރެއްވި ނަމަވެސް ބައެއް ރަށްރަށުގެ ކައުންސިލްތަކުން މިހާރު ވެސް ގޭބީސީތަކުގެ މަޢުލޫމާތު އެއްކުރަން ފައްޓައިފައިވެއެވެ.

މިދިޔަ ރޯދަމަހު ސަރުކާރުން ޖުމްލަ 108,801 މަސްދަޅު ކޭސް ރައްޔިތުންނަށް ބެހި ކަމަށް ފިނޭންސް މިނިސްޓްރީން ކުރިން ހާމަކޮށްފައިވެއެވެ. އެ ކޭސްތައް ގަތުމަށް ދައުލަތުން 79.4 މިލިއަން ރުފިޔާ ޚަރަދުކުރި އިރު މިފްކޯ އިން ކޮންމެ ކޭހަކުން 30 ރުފިޔާގެ ޑިސްކައުންޓެއް ދިނެވެ.

އެހެންކަމުން ސަރުކާރުން އެއް ކޭހަކަށް ޚަރަދުކުރީ 730 ރުފިޔާއެވެ.

"އެއީ ރޯދަ ހަދިޔާގެ ގޮތުގައި ރައްޔިތުންނަށް ބެހި 79 މިލިއަން ރުފިޔާ" ފިނޭންސް މިނިސްޓްރީގެ އޮފިޝަލަކު އެ ދުވަސްވަރު ވިދާޅުވެފައިވެއެވެ.

ފާއިތުވި ރޯދަމަހު މާލެ ސަރަޙައްދުގައި މަސްދަޅު ކޭސް ބެހީ ދައުލަތުގެ ކުންފުނިތަކާއި ސިފައިންގެ އެހީގައި ކަމަށް ވާ އިރު ރަށްރަށުގައި އެ މަސައްކަތް ކުރިއަށް ގެންދިޔައީ ކައުންސިލްތައް މެދުވެރިކޮށެވެ.