ޓީޖީއެސްޓީގެ އައު އުސޫލާ ދެކޮޅަށް އިޓަލީގެ ކިއާ އޯރާ ވިއާޖީން ރާއްޖެއަށް ބުކިން ނެގުން ހުއްޓާލައިފި

ބޭރުގެ ޓުއާ އޮޕަރޭޓަރުންނާއި އޮންލައިން ބުކިން ޕްލެޓްފޯމްތަކުން ޓީޖީއެސްޓީ ނެގުމުގެ އައު އުސޫލަށް އިއްޔެ ޢަމަލުކުރަން ފެށުމާ ގުޅިގެން، އިޓަލީގެ ޓުއާ އޮޕަރޭޓަރެއް ކަމަށްވާ ކިއާ އޯރާ ވިއާޖީން ރާއްޖެއަށް އައު ބުކިންތައް ނެގުމާއި ދަތުރުތައް ވިއްކުން މެދުކަނޑާލައިފިއެވެ.

އެ ކުންފުނިން އެ ކުންފުނީގެ ވެބްސައިޓުގައި ނެރުނު ބަޔާނެއްގައި ބުނެފައިވާ ގޮތުގައި، ރާއްޖޭގައި އެއްވެސް އޮފީހެއް ޤާއިމުނުކޮށް އިޓަލީގައި ހިންގާ ކޮންސަލްޓެންސީ އަދި އިންޓާމީޑިއަރީ މަސައްކަތްތަކުގެ މާޖިންއިން 17 އިންސައްތައިގެ ޓީޖީއެސްޓީ ދެއްކުމަށާއި މީރާގައި ރަޖިސްޓަރީވާން އެންގުމަކީ ބައިނަލްއަޤުވާމީ ޤާނޫނީ އުސޫލުތަކާ ޚިލާފު ކަމެއް ކަމަށް އެ ކުންފުނިން ދެކޭ ކަމަށެވެ. ރާއްޖޭގެ ރިސޯޓުތަކާއި ދަތުރުފަތުރާއި ސީދާ ރާއްޖެއިން ލިބިގަންނަ ހުރިހާ ޚިދުމަތަކަށް މިހާރު ވެސް ޤަވާއިދާ އެއްގޮތަށް ޖީއެސްޓީ އާއި ގްރީން ޓެކްސް ދައްކަމުން އަންނަ ކަމަށް ވެސް އެ ބަޔާނުގައި ފާހަގަކޮށްފައިވެއެވެ.

ކިއާ އޯރާ ވިއާޖީން ބުނެފައިވާ ގޮތުގައި، ރާއްޖޭގެ ސަރުކާރުން އިންސާފުވެރިކަމާއި ބައިނަލްއަޤުވާމީ ޤާނޫނީ ހަމަތަކަށް އިޙުތިރާމުކުރާ މާޙައުލެއް އަލުން ޤާއިމުވަންދެން މި ނިންމުން ދެމިއޮންނާނެއެވެ. ނަމަވެސް ކުރިން ކޮންފާމްކޮށްފައި ހުރި ބުކިންތައް ކުރިން އެއްބަސްވި އަގުގައި ކުރިއަށް ގެންދިޔުމަށް މަސައްކަތްކުރަމުންދާ ކަމަށާއި، އެހެންކަމުން ކުރިން ބުކިން ހަދާފައިވާ ފަތުރުވެރިން ކަންބޮޑުވާން ނުޖެހޭނެ ކަމަށް ވެސް އެ ކުންފުނިން ބުނެފައިވެއެވެ.

މި ފިޔަވަޅަކީ ޔޫރަޕުގެ އިއްތިޙާދުގެ ޓްރޭޑް ޔޫނިއަންތަކުން އެ އުސޫލާ ދެކޮޅަށް ހިންގާ ފުޅާ އިޙުތިޖާޖުގެ ބައެއް ކަމަށް ވެސް ކިއާ އޯރާ ވިއާޖީން ބުނެފައިވެއެވެ. ޔޫރަޕުގެ ޓްރެވަލް އެޖެންޓުންގެ ފެޑެރޭޝަން (އީސީޓީއޭއޭ) އިން ބްރަސަލްސްގައި ހުންނަ ރާއްޖޭގެ އެމްބެސީއަށް ކަންބޮޑުވުމުގެ ސިޓީއެއް ފޮނުވާފައިވާ އިރު، އިނގިރޭސި ވިލާތުގެ ޓްރެވަލް އެޖެންޓުންގެ ޖަމިއްޔާ (އޭބީޓީއޭ) އިން ވެސް މި ބަދަލަށް ޢަމަލުކުރުން ފަސްކޮށްދިނުމަށް އެދި ރާއްޖޭގެ ޓޫރިޒަމް ވުޒާރާއަށް ހުށަހެޅުމެއް ހުށަހަޅާފައިވެއެވެ.