ލޭ ހަދިޔާކުރާ މީހުން ތިބި ތަނަށް ގޮސް ލޭ ނެގޭނެ މޯބައިލް ޚިދުމަތެއް ތަޢާރަފުކުރައްވާނެ ކަމަށް ވަޒީރު ވިދާޅުވެއްޖެ

ލޭ ހޯދުމުގައި ދިމާވާ ދަތިތައް ޙައްލުކުރުމަށްޓަކައި ލޭ ދޭން ބޭނުންވާ ފަރާތް ހުރި ތަނަކަށް ގޮސް ލޭ ނެގޭނެ މޯބައިލް ޚިދުމަތެއް ވަރަށް އަވަހަށް ފައްޓަވާނެ ކަމަށް ޞިއްޙަތާއި ޢާއިލާއާއި އިޖުތިމާޢީ އެހީއާ ބެހޭ ވަޒީރު ގީލާ ޢަލީ ވިދާޅުވެއްޖެއެވެ.

ދިވެހިރާއްޖޭގެ އަޑުގެ "އަހާށޭ ބުނާނަން" ޕްރޮގްރާމުގައި ވާހަކަދައްކަވަމުން ވަޒީރު ވިދާޅުވީ ލޭ ހަދިޔާކުރާނެ މީހުން ހޯދުމުގައި ބޮޑެތި ގޮންޖެހުންތަކެއް އެބަހުރި ކަމަށެވެ. އެގޮތުން ލޭ ދިނުމަށް އަންނަ ބައެއް ފަރާތްތައް ކަނޑައެޅިފައިވާ ޝަރުތުތައް ފުރިހަމަނުވެގެން ލޭ ނުދެވޭ ޙާލަތްތައް ދިމާވާ ކަމަށާއި، ވަގުތު ނެތިގެން ސެންޓަރުތަކަށް ދެވެން ނެތް މީހުން ވެސް ގިނަ ކަމަށް ވަޒީރު ފާހަގަކުރެއްވިއެވެ.

"އަޅުގަނޑުމެން މަސައްކަތްކުރަމުން މި ގެންދަނީ ލޭ ދިނުމަށް އެދޭ ފަރާތްތަކަށް ވީހާ ވެސް ލުއިފަސޭހަ ގޮތްތަކެއް ހޯދައި ދިނުމަށް. މިގޮތުން އަޅުގަނޑުމެން ވަރަށް އަވަހަށް ތައާރަފު ކުރާނަން ލޭ ދިނުމަށްޓަކައި މޯބައިލް ޚިދުމަތެއް ރައްޔިތުންނާ ވީހާ ވެސް ގާތަށް ގޮސް އެ މީހުންގެ ލޭ ނަގާ އަދި ސްޓޯރޭޖް ފެސިލިޓީތަކަށް ގެންދިއުން." ވަޒީރު ވިދާޅުވިއެވެ.

ވަޒީރު ވިދާޅުވީ ލޭ ލިބުމުގެ މައްސަލައަށް ދާއިމީ ޙައްލެއް އަންނާނީ ލޭ ހަދިޔާކުރާ މީހުންގެ ޢަދަދު އިތުރުވެގެން ކަމަށެވެ.

މޯލްޑިވިއަން ބްލަޑް ސާވިސަސް (އެމްބީއެސް) ގެ ތަފާސްހިސާބުތައް ދައްކާ ގޮތުން މި ވަގުތު ރާއްޖޭގައި 668 މީހަކު ގަވާއިދުން ތެލެސީމިއާ ބައްޔަށް ލޭ އަޅަމުން ގެންދެއެވެ. އެ ޢަދަދުގެ ތެރެއިން 505 މީހުން ރެޖިސްޓާކޮށްފައި ވަނީ އަތޮޅުތެރޭގައި ކަމަށް ވާއިރު، މާލޭ ސަރަޙައްދުގައި ރެޖިސްޓާކޮށްފައި ވަނީ 163 މީހުންނެވެ. ތެލެސީމިއާ ބަލިމީހުންގެ އިތުރުން އެކްސިޑެންޓުތަކާއި އޮޕަރޭޝަންތަކާ ގުޅިގެން ވެސް ލޭ ބޭނުންވާ މިންވަރު ބޮޑެވެ.