އެމްޑީޕީގެ އިސްލާހުތައް ގަނޑުކޮށް ފާސްކުރުމުން ޕާޓީ ނިކަމެތިވެދާނެ ކަމަށް ސައްޕެ ވިދާޅުވެއްޖެ

އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް އެ ޕާޓީގެ އަސާސީ ޤަވާއިދަށް ހުށަހެޅުއްވި އިސްލާހުތައް އެއް ޕެކޭޖެއްގެ ގޮތުގައި ފާސްކޮށްފިނަމަ ޕާޓީއަށް އިތުރު މައްސަލަތައް ކުރިމަތިވެދާނެ ކަމަށް ހެންވޭރު އުތުރު ގޮފީގެ ރައީސް އަޙްމަދު ޝަފީޤް (ސައްޕެ) ވިދާޅުވެއްޖެއެވެ.

މިހާރު ކުރިއަށްދާ އެމްޑީޕީގެ ކޮންގްރެސްގައި މެންބަރުންނަށް ޚިޔާލުފާޅުކުރުމަށް ލިބުނު ފުރުޞަތުގައި ވާހަކަދައްކަވަމުން ސައްޕެ ވިދާޅުވީ ފައްޔާޒް ހުށަހެޅުއްވި އިސްލާހުތަކުގެ ތެރޭގައި ރަނގަޅު ކަންކަން ހިމެނޭ ކަމަށެވެ. ނަމަވެސް އެ ހުރިހާ އިސްލާހެއް ގަނޑުކޮށް ވޯޓަށް އެހުމަކީ ޕާޓީއަށް ލިބޭނެ ވަރަށް ބޮޑު ދެރައެއް ކަމަށާއި، އެ ގޮތަށް ޢަމަލުކުރުމުގެ ފަހަތުގައި ހީލަތްތެރިކަމެއް އޮތް ކަމަށް ދެކެވަޑައިގަންނަވާ ކަމަށް ވިދާޅުވެ، ވަކިވަކިން ވޯޓަށް އެހޭ ގޮތަށް އިންތިޒާމު ބަދަލުކުރުމަށް ގޮވައިލެއްވިއެވެ. އޭނާ ވިދާޅުވީ މިއީ ބައިވެރިވެވަޑައިގަންނަވާ ހަތަރުވަނަ ކޮންގްރެސް ކަމަށާއި، ޕާޓީ ތެރޭގައި ކަންކަން ހިނގާފައިވާ ގޮތް ވަރަށް ރަނގަޅަށް އެނގިވަޑައިގަންނަވާ ކަމަށެވެ.

ޕާޓީގެ ރައީސާއި ނައިބު ރައީސްގެ މަޤާމު އުވައިލައި ހުރިހާ ބާރެއް އެއް މަޤާމަކަށް ޖަމާކުރާ ގޮތަށް ގެންނަ ބަދަލުތަކަށް ވެސް ސައްޕެ ވަރަށް ބޮޑަށް ދެކޮޅު ހެއްދެވިއެވެ. އެ ދެ މަޤާމަކީ ކުރީގެ ކޮންގްރެސްތަކުގައި ފުޅާ ދާއިރާއެއްގައި ބަހުސްކޮށް ފަންނީ ބޭފުޅުންގެ މަޝްވަރާއާ އެކު އަސާސީ ޤަވާއިދުގައި ހިމަނާފައިވާ މުހިންމު މަޤާމުތަކެއް ކަމަށް ވިދާޅުވިއެވެ.

"އަޅުގަނޑުމެން ވަރަށް ދެކޮޅު ކަމެއް ޕާޓީގެ ރައީސާއި ނައިބު ރައީސް މަޤާމުން ވަކިކުރުމަކީ. އެ ހުރިހާ ބާރުތަކެއް އެކަކަށް ހަވާލުކުރާ ވާހަކަ މި ދައްކަނީ. މިއީ އެއްގޮތަކަށްވެސް ކޮށްގެން ވާނެ ކަމެއް ނޫން. މި ޕާޓީއަކީ ޑިމޮކްރެޓިކް ޕާޓީއެއް،" ސައްޕެ ވިދާޅުވިއެވެ.

ޕާޓީ އުފެދުނު ދުވަސްވަރު ޕިކަޕް ބުރެއް ޖެހުން ފަދަ ކަންކަމުން ޕާޓީ ކުރިއެރުވުމަށް ކުރެއްވި ބުރަ މަސައްކަތްތައް ހަނދާން އައުކުރައްވަމުން ސައްޕެ ވިދާޅުވީ ޑިމޮކްރެޓިކް ހަމަތަކާއި ހެޔޮ ވެރިކަމުގެ އަސާސްތައް ގެއްލޭ ގޮތަށް އަސާސީ ޤަވާއިދު ބަދަލުކުރުމަކީ ހެދޭނެ ވަރަށް ބޮޑު ގޯހެއް ކަމަށެވެ. ވަކިވަކި މާއްދާތަކަށް ވަކިން ބަހުސްކޮށް ވޯޓަށް އެހުމަކީ ކޮންމެހެން ކުރަންޖެހޭ ކަމެއް ކަމަށް ވެސް އޭނާ ވިދާޅުވިއެވެ.