މަނަދޫގައި އެފްއެސްއެމްގެ ފިއުލް ސްޓޭޝަނެއް ހުޅުވައި ޚިދުމަތް ދޭން ފަށައިފި

މަސްވެރިންނަށް ހެޔޮ އަގުގައި ތެޔޮ ފޯރުކޮށްދިނުމަށް ސަރުކާރުން ގެންގުޅޭ ސިޔާސަތުގެ ދަށުން ނ. މަނަދޫގައި ޤާއިމުކުރި ފިއުލް ސްޓޭޝަނުން މިރޭ ރަސްމީކޮށް ޚިދުމަތް ދޭން ފަށައިފިއެވެ.

ފިއުލް ސަޕްލައިސް މޯލްޑިވްސް (އެފްއެސްއެމް) އާއި ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ގުޅިގެން ތަރައްޤީކުރި މި ސްޓޭޝަން ހުޅުއްވައިދެއްވީ މަނަދޫގައި މިރޭ ބޭއްވި ޚާއްޞަ ރަސްމިއްޔާތެއްގައި ރައްޔިތުންގެ މަޖިލީހުގެ މަނަދޫ ދާއިރާގެ މެންބަރު ހުސްނީ މުބާރަކެވެ. އެ ރަސްމިއްޔާތުގައި މަނަދޫ ކައުންސިލް މެންބަރުންނާއި މުއައްސަސާތަކުގެ އިސްވެރިންނާއި ގިނަ ޢަދަދެއްގެ ޢާންމު ރައްޔިތުން ބައިވެރިވެފައިވެއެވެ.

މި ޚިދުމަތް ފެށުމާ އެކު، މާލެއިން ތެޔޮ ވިއްކާ އަގުގައި މަނަދޫއިން ވެސް ޑީސަލް ލިބެން ހުންނާނެ ކަމަށް އެފްއެސްއެމުން ބުނެފައިވެއެވެ. މި ސްޓޭޝަނުގެ ސަބަބުން މަނަދޫގެ އިތުރުން އެ ސަރަޙައްދުގެ މަސްވެރިންނަށާއި ދަތުރުފަތުރުކުރާ ފަރާތްތަކަށް ފަސޭހަކަމާ އެކު އަގުހެޔޮކޮށް ތެޔޮ ލިބިގެންދާނެއެވެ.

މިއީ ރައީސް ޑރ. މުޙައްމަދު މުޢިއްޒު އަތޮޅުތެރޭގެ އިޤްތިޞާދީ ޙަރަކާތްތަކަށް ލުއިފަސޭހަ ކޮށްދެއްވުމަށް ވެވަޑައިގެންފައިވާ ވަޢުދުގެ ތެރެއިން އެޅުއްވި ފިޔަވަޅެކެވެ.