އައްޑޫގެ ކަރަންޓު ޚިދުމަތް ރަނގަޅުކުރުމަށް އެއްބައިވެގެން މަސައްކަތްކުރުމަށް ސްޓެލްކޯގެ އެމްޑީ އެދިވަޑައިގެންފި

ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން އައްޑޫ ސިޓީގެ ކަރަންޓުގެ ޚިދުމަތާ ރަސްމީކޮށް ހަވާލުވުމަށް އެ ސިޓީއަށް ކުރައްވާ ދަތުރުގެ ތެރެއިން، އެ ކުންފުނީގެ މެނޭޖިންގ ޑިރެކްޓަރ ޑރ. ޢަލީ އަޒުވަރު ރޭ މުވައްޒަފުންނާ ބައްދަލުކުރައްވައި، ސްޓެލްކޯގެ މަތީ މިންގަނޑަށް ޚިދުމަތް ގެނައުމަށް އެންމެން ގުޅިގެން މަސައްކަތްކޮށްދެއްވުމަށް އެދިވަޑައިގެންފިއެވެ.

އެ ބައްދަލުވުން ބާއްވާފައިވަނީ ހިތަދޫ ސެންޓްރަލް ޕަވަރ ސްޓޭޝަނާއި މަރަދޫފޭދޫގައި މަސައްކަތްކުރާ މުވައްޒަފުންނާ އެކުގައެވެ. ސްޓެލްކޯއިން އެކްސްގައި ކުރި ޕޯސްޓެއްގައި ބުނީ، އެ ބައްދަލުވުމުގައި ދަތުރުގެ ތެރެއިން ފާހަގަކުރެވުނު ޚިދުމަތާ ގުޅޭ މުހިންމު ކަންތައްތަކަށް އެމްޑީ އަލިއަޅުއްވައިލެއްވި ކަމަށެވެ. އެގޮތުން ސްޓެލްކޯގައި ހެދިފައިވާ އުސޫލުތަކާއި ގަވައިދުތަކަށް ތަބާވެގެން މަސައްކަތްކުރުމުގެ މުހިންމުކަން ފާހަގަކުރައްވައި، ސްޓެލްކޯއަކީ ރައްޔިތުންނަށް އަސާސީ ޚިދުމަތެއް ފޯރުކޮށްދޭ 76 އަހަރުގެ ފަޚުރުވެރި ތާރީޚެއް އޮތް ކުންފުންޏެއްކަން ދެނެގެން މަސައްކަތްކުރުމަށް ނަސޭހަތްތެރިވެވަޑައިގެންނެވި ކަމަށެވެ.

މީގެ އިތުރުން މަސައްކަތުގެ މާޙައުލުގައި މުވައްޒަފުންނަށް ކުރިމަތިވާ ދަތިތަކާއި ގޮންޖެހުންތައް އޮޅުންފިލުއްވައި، އެ ކަންކަމަށް ޙައްލު ހޯއްދެވުމަށް މެނޭޖްމަންޓުން އަޅުއްވާނެ ފިޔަވަޅުތަކާ ގުޅޭ ގޮތުން ވެސް ފުޅާ ދާއިރާއެއްގައި މަޝްވަރާކުރެއްވި ކަމަށް އެ ކުންފުނިން ބުނެފައިވެއެވެ.

އެމްޑީ ވިދާޅުވެފައިވަނީ ސްޓެލްކޯއިން އައްޑޫ ސިޓީގެ ކަރަންޓުގެ ޚިދުމަތާ ދެވަނަ ފަހަރަށް ހަވާލުވުމަކީ "އެ ސިޓީގެ ރައްޔިތުންނަށް ލިބުނު އައު އުއްމީދެއް" ކަމަށެވެ. އަދި ޒަމާނީ ވަސީލަތްތައް ބޭނުންކޮށްގެން ދެމެހެއްޓެނިވި، ފެންވަރު ރަނގަޅު ޚިދުމަތެއް އައްޑޫގެ ރައްޔިތުންނަށް ފޯރުކޮށްދެއްވާނެ ކަމުގެ ޔަޤީންކަން ވެސް އޭނާ ވަނީ ދެއްވައިފައެވެ.

ހަވާލުވުމުގެ މަސައްކަތުގެ ތެރެއިން، ޑރ. ޢަލީ އަޒުވަރާއި ކުންފުނީގެ އިސްވެރިން އިއްޔެ ވަނީ ސްޓެލްކޯގެ މަރަދޫފޭދޫ އޮފީހުގައި ކުންފުނީގެ ދިދަ ނަންގަވައިދެއްވައިފައެވެ.