ދެވަނަ ޙިއްޞާގެ ބާޒާރެއް ހިންގުމަށް ނޭޝަނަލް އެކްސްޗޭންޖް ލިމިޓެޑް އުފައްދަވައިފި

ރާއްޖޭގައި ދެވަނަ ޙިއްޞާގެ ބާޒާރެއް ޤާއިމުކުރުމުގެ މަޤުޞަދުގައި ސައްތައިން ސައްތަ ސަރުކާރު ހިއްސާވާ ކުންފުންޏެއް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު އުފައްދަވައިފިއެވެ.

ނޭޝަނަލް އެކްސްޗޭންޖް ލިމިޓެޑްގެ ނަމުގައި އުފެއްދެވި މި ކުންފުނި ވުޖޫދަށް ގެންނެވީ ކުންފުނީގެ ޤާނޫނު (ޤާނޫނު ނަންބަރު 2023/7) ގެ 15 ވަނަ މާއްދާއިން ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުން ނެރުއްވި ނަންބަރު 2026/16 ޤަރާރު މެދުވެރިކޮށެވެ. ރައީސް އޮފީހުން ހާމަކުރި ގޮތުގައި، އިސްލާމީ މާލީ ދާއިރާ ފުޅާވަމުން އަންނަ މި ދަނޑިވަޅުގައި ސަރުކާރުގެ މާލީ ބޭނުންތަކަށް އެހީތެރިވެދޭ ދެވަނަ ޙިއްޞާގެ ބާޒާރެއް ކުރިއަށް ގެންދިޔުމަކީ އެ ކުންފުނީގެ އަސާސީ މަޤުޞަދެވެ.

އެ ކުންފުނީގެ ޒިންމާތަކުގެ ތެރޭގައި ރާއްޖޭގެ ކެޕިޓަލް މާކެޓު ތަރައްޤީކޮށް، ބާޒާރުގެ އިތުބާރާއި ދެފުށް ފެންނަ މިންވަރު ހަރުދަނާކުރުން ހިމެނެއެވެ. އެއާ އެކު ޒަމާނީ ސެކިއުރިޓީޒް އެކްސްޗޭންޖްތަކާއި ޓްރޭޑިންގ ފެސިލިޓީތައް ޤާއިމުކޮށް ހިންގުމާއި، ދައުލަތުގެ ސެކިއުރިޓީޒް އާއި އިސްލާމީ ޝަރީޢާގެ ހަމަތަކަށް ފެތޭ ސުކޫކް ފަދަ މާލީ ވަސީލަތްތައް ނެރެ، ލިސްޓުކޮށް، މުޢާމަލާތު ކުރެވޭނެ މަގު ފަހިކުރުން ވެސް އެ ކުންފުނީގެ މެންޑޭޓުގެ ތެރޭގައި ހިމެނެއެވެ.

މީގެ އިތުރުން ސެންޓްރަލް ސެކިއުރިޓީޒް ޑިޕޮސިޓަރީ އާއި ކްލިއަރިންގ އަދި ސެޓްލްމަންޓުގެ ޒަމާނީ ޕޯސްޓް-ޓްރޭޑް ޚިދުމަތްތައް ފޯރުކޮށްދިނުމަކީ ވެސް އެ ކުންފުނީގެ ލަނޑުދަނޑިއެކެވެ. ރާއްޖެ އާއި ރާއްޖެއިން ބޭރުގެ މާލީ މުއައްސަސާތަކާ ގުޅިގެން ހަރުދަނާ އަދި ދެމެހެއްޓެނިވި މާލީ ބާޒާރެއް ރާއްޖޭގައި ބިނާކުރުމަކީ ވެސް އެ ކުންފުނިން ހާސިލުކުރުމަށް ކަނޑައަޅާފައިވާ އަމާޒެކެވެ.