އަމީނީމަގުގެ ތާރު އެޅި ދެ ސެގްމެންޓު އާދިއްތަ ދުވަހު ޢާންމުންނަށް ހުޅުވައިލަނީ

އަމީނީމަގުގައި އަލުން ތާރު އެޅުމުގެ މަސައްކަތުގެ ފުރަތަމަ ދެ ސެގްމެންޓު ނިންމައި، އަންނަ މަހުގެ ހަތަރު ވާ އާދިއްތަ ދުވަހު އެ ސަރަޙައްދު ޢާންމުންނަށް ހުޅުވައިލުމަށް ނިންމާފައިވާ ކަމަށް އިންފްރާސްޓްރަކްޗާ ވުޒާރާއިން މިއަދު ބުނެފިއެވެ.

ދެވަނަ ސެގްމެންޓުގެ ގޮތުގައި ގިޔާސުއްދީން ސްކޫލާ ހިސާބުން ދިވެހިރާއްޖޭގެ އަޑާ ހަމައަށް ތާރު އެޅުމުގެ މަސައްކަތް ނިންމައިލީ މިދިޔަ ހޯމަ ދުވަހުއެވެ. ފުރަތަމަ ސެގްމެންޓުގެ ދަށުން އެ ހިސާބުން ދަރުމަވަންތަ ހޮސްޕިޓަލާ ދިމާއަށް އޮތް ބައިގައި ކުރިން ވަނީ ތާރު އަޅައި ނިންމައިފައެވެ.

މި މަޝްރޫޢު އެމްޓީސީސީއާ ހަވާލުކުރީ މިދިޔަ ޖޫން މަހުއެވެ. ކުރީގެ ތާރުގަނޑު އުފުލި ބޮޑެތި އަޑިގުޑަންތައް ހެދި، ދުއްވާ ފަރާތްތަކަށް ނުރައްކާ ކުރިމަތިވާތީ، ކުރީގެ ތާރުގަނޑު އެއްކޮށް ނެގުމަށް ފަހު އަލުން ހެދުމުގެ މަސައްކަތް ފެށީއެވެ. މި މަސައްކަތް ކުރިއަށް ގެންދިޔައިރު އެ ސަރަޙައްދުގެ ބަހުގެ ޚިދުމަތް ވަނީ ވަގުތީ ގޮތުން މެދުކަނޑައިލައިފައެވެ. ބަންދުކޮށްފައިވާ ސަރަޙައްދަކީ މާލެއާއި ހުޅުމާލެ އަދި އެއާޕޯޓަށް ބަސް ދަތުރުކުރާ މަގެވެ.

އަމީނީމަގު ޒަމާނީ ފެންވަރަށް ތަރައްޤީކުރުމުގެ ބޮޑު މަޝްރޫޢެއް ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުން އާރްޑީސީއާ ހަވާލުކޮށް ފެށީ ޖުލައި 2022 ގައެވެ. ފިޔަވަހިތަކަކަށް ބަހައިލައިގެން ކުރިއަށް ގެންދިޔަ އެ މަޝްރޫޢުގެ އެންމެ ފަހު ބައި ނިންމައި ހުޅުވީ 2024 ވަނަ އަހަރުއެވެ. އެހެން ނަމަވެސް މަގުގެ އެކި ހިސާބުތަކުގެ ތާރުގަނޑު ބޮޑަށް ހަލާކުވެ، މިދިޔަ އަހަރު ވެސް ބައެއް ސަރަޙައްދުތައް މަރާމާތުކުރަން ޖެހުނެވެ.