ކާރު ތެރެއަށް ކުއްޖަކަށް ހޮޑުލެވުނު މައްސަލާގައި ނަލަ ޓެކްސީން ހަގީގަތް ހާމަކޮށްފި

ތުއްތު ކުއްޖަކު ކާރު ތެރެއަށް ހޮޑުލެވުމާ ގުޅިގެން ޑްރައިވަރު ފައިސާއަށް ޑިމާންޑުކުރި ކަމަށް ބުނެ ސޯޝަލް މީޑިއާގައި ފެތުރެމުންދާ ވާހަކަތަކުގެ ހަގީގަތް ނަލަ ޓެކްސީ ސެންޓަރުން މިއަދު ހާމަކޮށްފިއެވެ.

ސޯޝަލް މީޑިއާގައި އަންހެނަކު ކުރި ޕޯސްޓެއްގައި ބުނެފައިވާ ގޮތުން، ތިން ކުދިން ގޮވައިގެން ހުޅުމާލޭ ފޭސް ދޭކުން ޖެޓީ ނަންބަރު 7 އަށް ކުރި ދަތުރުގެ ތެރޭގައި އެއް އަހަރުގެ ކުއްޖާއަށް ހޮޑުލެވުމުން، ޝީޓު ސާފުކުރުމުގެ އަގެއްގެ ގޮތުގައި ޑްރައިވަރު 1،500 ރުފިޔާ ހޯދުމަށް ޑިމާންޑުކުރި ކަމަށެވެ.

ނަމަވެސް އެ ސެންޓަރުން ބުނީ، ނަލަ ޓެކްސީ އެޕް މެދުވެރިކޮށް އިއްޔެ ހަވީރު ނެގި އެ ދަތުރުގައި ކުއްޖާއަށް ހޮޑުލެވުނުކަން ކަސްޓަމަރު ބުނީ ބްރިޖް ޓްރެފިކް ލައިޓާ ހިސާބުން ކަމަށެވެ. ޑްރައިވަރު ކޮތަޅު ހުންނާނެ ކަމަށް ބުނުމަށް ފަހު، ޝީޓު ސާފުކުރުމަށް ތަންތަނުން އާންމުކޮށް 1،500 ރުފިޔާ ވަރު ނަގާ ކަމުގެ މައުލޫމާތު ކަސްޓަމަރަށް ދިން ކަމަށް ޑްރައިވަރާ ހަވާލާދީ އެ ސެންޓަރުން ބުނެފައިވެއެވެ. އެ ހިސާބުން ކަސްޓަމަރު އެހެން މީހަކަށް ގުޅައި، އެ ފަރާތުން އެދުނީ ކަސްޓަމަރު ބޭނުންވި މަންޒިލަށް ގެންދިޔުމަށް ފަހު، އެ ފަރާތް ބުނާ ތަނަކަށް ކާރު ސާފުކުރުމަށް ދިޔުމަށް ކަމަށެވެ.

ޑްރައިވަރު އެގޮތަށް އަމަލުކުރި ނަމަވެސް، ފޯނުން ގުޅި ފަރާތް ބުނެގެން ދިޔަ ތަނުން އެ ވަގުތު ކާރު ސާފުކޮށްދެވެން ނެތް ކަމަށް ބުނި ކަމަށް ސެންޓަރުން ބުނެފައިވެއެވެ. ޖެހިގެން ހުރި ތަނަކުން ސާފުކޮށްދޭން ފުރަތަމަ އެއްބަސްވީ 1،600 ރުފިޔާއަށް ނަމަވެސް، ފަހުން އެ އަގު 1،000 ރުފިޔާއަށް ކުޑަކޮށްދިން ކަމަށެވެ. ފޯނުން ގުޅި ފަރާތާއި ޑްރައިވަރާ ދެމެދު ވާހަކަ ދެކެވި، 1،000 ރުފިޔާއަށް ދެ ފަރާތުން އެއްބަސްވެގެން އެ ފައިސާ ނެގީ ކަމަށާއި، ސާފުކުރުމުގެ ފޮޓޯ ވެސް އެ ފަރާތާ ހިއްސާކުރި ކަމަށް ސެންޓަރުން ބުނެފައިވެއެވެ.

ޝީޓު ސާފުކުރުމަށް ފައިސާ ލިބުނު ނަމަވެސް، ސާފުކުރުމަށް ދިޔަ ޚަރަދު ފިޔަވައި ކަސްޓަމަރު ކުރި ދަތުރުގެ އަގު ވެސް ޑްރައިވަރަށް ލިބިފައި ނުވާ ކަމަށް ނަލަ ޓެކްސީން ބުނެފައިވެއެވެ. ދެ ފަރާތުން ވާހަކަ ދައްކައިގެން ގޮތަކަށް އެއްބަސްވުމަށް ފަހު، ޑްރައިވަރާއި ސެންޓަރުގެ އަގު ވެއްޓޭ ގޮތަށް ހަގީގަތް އޮޅޭ ގޮތަށް ސޯޝަލް މީޑިއާގައި ވާހަކަ ފެތުރުމަކީ ކަންބޮޑުވާ ކަމެއް ކަމަށް އެ ސެންޓަރުން ބުނެފައިވެއެވެ.