ގްލޯބަލް ދުކާނުން ދިވެހި ރުފިޔާއިން ފައިސާ ދެއްކޭ ގޮތް ހަމަޖައްސައިފި

އިންޑިއާގެ އީކޮމާސް މާކެޓް ޕްލޭސް ގްލޯބަލް ދުކާން މެދުވެރިކޮށް ވިޔަފާރިކުރާ ދިވެހިންނަށް ދިވެހި ރުފިޔާއިން ފައިސާ ދެއްކޭނެ އިންތިޒާމު މޯލްޑިވްސް ޕޯސްޓުން ހަމަޖައްސައިފިއެވެ.

މި ޚިދުމަތް ބޭނުންކުރުމަށް ކަސްޓަމަރުން ޗެކްއައުޓް ކުރާ މަރުހަލާގައި "ޕޭ ތުރޫ މޯލްޑިވްސް ޕޯސްޓް" އިޚުތިޔާރުކުރުމަށްފަހު ދީފައިވާ އިރުޝާދާ އެއްގޮތަށް ފައިސާ ދެއްކުން ފުރިހަމަކުރެވޭނެ ކަމަށް އެ އިދާރާއިން ބުނެފައިވެއެވެ. ޝަރުތު ހަމަވާ ކަސްޓަމަރުންނަށް ގްލޯބަލް ދުކާން އެޕްލިކޭޝަން މެދުވެރިކޮށް ދިވެހި ރުފިޔާއިން ފައިސާ ދެއްކުމަށް ޕޭމަންޓް ލިންކެއް ލިބޭނެ ކަމަށް ވެސް ޕޯސްޓުން ބުނެފައިވެއެވެ. މީގެ ކުރިން ބޭރު ފައިސާ ބޭނުންކުރާ ބައިނަލްއަޤުވާމީ ޕޭމަންޓް ގޮތްތައް ނޫން އެހެން ގޮތެއް ނެތް ނަމަވެސް، މި ބަދަލާ އެކު ދިވެހި ރުފިޔާއިން ސީދާ ފައިސާ ދެއްކުމުގެ ފުރުސަތު ހުޅުވިގެންދާނެ ކަމަށް އެ އިދާރާއިން ބުނެއެވެ.

ގްލޯބަލް ދުކާނުގައި އެމެޒަން، ފްލިޕްކާޓް، މިންތްރާ، ނައިކާ، ނައިކާ ފެޝަން އަދި އިކިއާ ފަދަ މަޝްހޫރު ޕްލެޓްފޯމްތައް ހިމެނެއެވެ. އެ ޕްލެޓްފޯމްތައް މެދުވެރިކޮށް ފެޝަނާއި ލައިފްސްޓައިލް ސާމާނާއި އިލެކްޓްރޯނިކް ތަކެއްޗާއި ގެއާއި ބަދިގެއަށް ބޭނުންވާ ސާމާނާއި ރީތިވާ ސާމާނު ހިމެނޭ ގޮތުން ތަފާތު ބާވަތްތައް ގަނެވޭނެއެވެ.

މި ޚިދުމަތް ބޭނުންކުރުމަށް އިންޑިއާގެ އެޑްރެހެއް ބޭނުން ނުވާ އިރު، މޯލްޑިވްސް ޕޯސްޓާއި އިންޑިއާ ޕޯސްޓް ގުޅިގެން ރާއްޖޭގެ ކޮންމެ ހިސާބަކަށް ވެސް ތަކެތި ޑެލިވަރީ ކޮށްދެއެވެ. ޕޯސްޓް އޮފީހުން ފާހަގަކޮށްފައިވާ ގޮތުގައި މި ބަދަލަކީ ދިވެހިންނަށް އޮންލައިންކޮށް ވިޔަފާރިކުރުމާއި ބައިނަލްއަޤުވާމީ މާކެޓް ޕްލޭސްތަކަށް ވާސިލުވުމުގެ ފުރުސަތު އިތުރަށް ފުޅާކުރެވުނު ކުރިއެރުމެކެވެ.