އދ. ގެ ޢާންމު މަޖިލީހުގައި ތަޤުރީރުކުރައްވައި ނައިބު ރައީސް ދަތުރުފުޅު ނިންމަވާލައްވައިފި

އދ. ގެ ޢާންމު މަޖިލީހުގެ 81 ވަނަ ސެޝަންގެ ހައި-ލެވެލް ހަފުތާގެ ޙަރަކާތްތަކުގައި ބައިވެރިވެވަޑައިގަތުމަށް ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފް ނިއުޔޯކަށް ކުރެއްވި ރަސްމީ ދަތުރުފުޅު ނިންމަވާލައްވައިފިއެވެ.

އެ ދަތުރުފުޅުގައި ނައިބު ރައީސް ވަނީ ޤައުމީ ބަޔާން އިއްވަވައި، ކޮންމެ ޤައުމެއްގެ ވެސް މުސްތަޤުބަލު ބައްޓަންކުރުމުގެ އަސާސީ ޙައްޤު އެ ޤައުމަކަށް ލިބެންޖެހޭ ކަމަށް ވިދާޅުވެފައެވެ. ކުދި ޖަޒީރާ ޤައުމުތަކުގެ ސަލާމަތަށް ހުރި ގޮންޖެހުންތަކާ ގުޅޭ ގޮތުން ވާހަކަފުޅު ދައްކަވަމުން، 2040 ވަނަ އަހަރާ ހަމައަށް ރާއްޖެ ތަރައްޤީވެފައިވާ ޤައުމަކަށް ބަދަލުކުރެއްވުމަށް ރައީސް ޑރ. މުޙައްމަދު މުޢިއްޒު ގެންގުޅުއްވާ ތަޞައްވުރާ އެ ގޮންޖެހުންތައް ގުޅިފައިވާ ކަމަށް ވިދާޅުވެފައިވެއެވެ.

މީގެ އިތުރުން 1967 ގެ ކުރީގެ ސަރަޙައްދީ އިންތަކުގެ މައްޗަށް ބިނާކޮށް، އިރުމަތީ ޤުދުސް ވެރިރަށް ކަމުގައި ހިމެނޭ ގޮތަށް ފަލަސްޠީނުގެ މިނިވަން ދައުލަތެއް ޤާއިމުކުރުމަށް ބައިނަލްއަޤުވާމީ މައިދާނުގައި އެމަނިކުފާނު ވަކާލާތު ކުރައްވާފައިވެއެވެ. ހަމައެއާ އެކު އދ. ގެ ސަލާމަތީ މަޖިލީހުން ކުދި ޖަޒީރާ ޤައުމުތަކަށް ދައުރުވާ ގޮނޑިއެއް ކަނޑައެޅުމަށާއި އދ. ގެ ނިޒާމު ފުރިހަމައަށް އިޞްލާޙުކުރުމަށް ވެސް ގޮވައިލައްވާފައިވެއެވެ.

ކަނޑުގެ ލޮނުގަނޑު އުފުލުމާ ގުޅޭ މަތީ ފަންތީގެ ޕްލެނަރީ ބައްދަލުވުމުގައި ތަޤުރީރު ކުރައްވަމުން ނައިބު ރައީސް ވިދާޅުވީ ރަށްތައް ގިރެމުންދާ މައްސަލައާ ކުރިމަތިލުމުގައި ރާއްޖެ ފަހަތަށް ނުޖެހޭނެ ކަމަށާއި ވިލުންތެރިކަން އިސްކުރައްވާނެ ކަމަށެވެ. ލޮނުގަނޑު އުފުލުމަކީ ޤާނޫނީ ގޮތުން ބަލައިގެންފައިވާ ކަނޑުގެ ސަރަޙައްދީ އިންތައް އުނިވާންޖެހޭ ސަބަބެއް ނޫން ކަމަށާއި ބައިނަލްއަޤުވާމީ ޤާނޫނުތަކާ އެއްގޮތަށް އުފެދިފައިވާ ދައުލަތެއް ނެތިދާންޖެހޭ ސަބަބެއް ވެސް ނޫން ކަމަށް ވިދާޅުވެ، މޫސުމީ ބަދަލުތަކަށް ހޭނުމަށް ބޭނުންވާ ހިލޭ އެހީ ފުޅާ ދާއިރާއެއްގައި އަވަހަށް ފޯރުކޮށްދިނުމަށް އެމަނިކުފާނު އިލްތިމާސް ކުރެއްވެވިއެވެ.

އެ ދަތުރުފުޅުގެ ތެރެއިން ނައިބު ރައީސް ވަނީ އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް އާއި ބަންގްލަދޭޝްގެ ބޮޑުވަޒީރު ތާރިޤް ރަޙްމާންއާ ބައްދަލުކުރައްވައި މަޝްވަރާތައް ބާއްވަވާފައެވެ. ޗައިނާއިން އިންތިޒާމުކުރި ގްލޯބަލް ޑިވެލޮޕްމަންޓް އިނިޝިއޭޓިވްގައި ވެސް އެމަނިކުފާނު ތަޤުރީރު ކުރައްވާފައިވެއެވެ.