ރަސްމާލެ މަޝްރޫޢުން ދައުލަތަށް 11 ބިލިއަން ޑޮލަރު ލިބޭނެ ކަމަށް ޒަރީރު ވިދާޅުވެއްޖެ

ޔޫއޭއީގެ އީގަލް ހިލްސް ކުންފުންޏާ ގުޅިގެން ރަސްމާލޭގައި ހިންގާ "މޯލްޑިވްސް ވޯޓާ ފްރަންޓް އެންޑް މެރީނާ" މަޝްރޫޢުގެ ތަރައްޤީގެ 10 އަހަރުގެ ތެރޭގައި 11 ބިލިއަން ޑޮލަރު (169 ބިލިއަން ރުފިޔާ) އަށް ވުރެ ބޮޑު އާމްދަނީއެއް ދައުލަތަށް ވަންނާނެ ކަމަށް ފިނޭންސް މިނިސްޓަރު ޙަސަން ޒަރީރު ވިދާޅުވެއްޖެއެވެ.

މިނިސްޓަރު އެކްސް މެދުވެރިކޮށް ހާމަކުރެއްވި މަޢުލޫމާތުތަކަށް ބަލާއިރު، 500 ހެކްޓަރުގެ ސަރަޙައްދެއްގައި 20 ބިލިއަން ޑޮލަރު ޚަރަދުކޮށްގެން ކުރިއަށް ގެންދާ މި މަޝްރޫޢުން ކޮންމެ އަހަރަކު އެވެރެޖްކޮށް ގާތްގަނޑަކަށް 1.1 ބިލިއަން ޑޮލަރު ދައުލަތަށް ލިބޭނެއެވެ. އެ މަޝްރޫޢުގެ ދަށުން ގެދޮރާއި ހޮޓާ ރިސޯޓުތަކާއި މެރީނާގެ އިތުރުން ފިހާރަ، އޮފީސް، ތަޢުލީމީ އަދި ޞިއްޙީ މަރުކަޒުތައް ބިނާކުރުމަށް ރާވާފައިވެއެވެ. މިނިސްޓަރު ފާހަގަކުރެއްވި ގޮތުގައި މި ލަފާކުރެވޭ އާމްދަނީއަކީ ރާއްޖޭގެ 179 ރިސޯޓާއި 16 ހޮޓަލާއި 920 ގެސްޓްހައުސް އަދި 165 ސަފާރީ އުޅަނދުން މިހާރު ދައުލަތަށް ވަންނަ ޖުމްލައަށް ވުރެ ވެސް ބޮޑު ޢަދަދެކެވެ.

އެއްބަސްވުމުގައި ދައުލަތަށް ފައިސާ ލިބޭ ގޮތްތަކުގެ ތެރޭގައި ކަނޑައެޅިފައިވާ ރޭޓުތަކުން ނެގޭ ޓީޖީއެސްޓީ ހިމެނެއެވެ. އެއާ އެކު ތަންތަން ފުރަތަމަ ފަހަރަށް ވިއްކައިގެންނާއި ކުއްޔަށް ދީގެން ޑިވެލޮޕަރަށް ލިބޭ ފައިސާގެ 10 އިންސައްތަ ދައުލަތަށް ދައްކަން ޖެހެއެވެ. ހަމައެހެންމެ ފުރަތަމަ ފަހަރަށް ތަނެއް ގަންނަ ފަރާތުން އެ ތަނުގެ އަގުގެ ހަތަރު އިންސައްތަ ދައުލަތަށް ދެއްކުން ލާޒިމުވެއެވެ. މި އެއްބަސްވުމުގައި އެއްވެސް ޓެކްސް އިނާޔަތެއް ނުވަތަ ޑިއުޓީ މާފެއް ހިމެނިފައި ނުވާ ކަމަށް ވެސް މިނިސްޓަރު ވިދާޅުވިއެވެ.

"މި މަޝްރޫއު ކުރިއަށް ގެންދިއުމަށް ދައުލަތުން އެއްވެސް ލޯނެއް ނުނަގާނެ. އަދި ސޮވެރިން ގެރެންޓީއެއް ވެސް ނުދޭނެ. މީގެ ސަބަބުން ދައުލަތަށް މާލީ އިލްތިޒާމެއް ނުއުފުލައި ސީދާ އާމްދަނީ ލިބޭނެ މަގު ކަށަވަރުވެގެންދާނެ" މިނިސްޓަރު ވިދާޅުވިއެވެ.

ތަންތަން ވިއްކައިގެން ލިބޭ ހުރިހާ ފައިސާއެއް ރައްކާކުރާނީ ރާއްޖޭގައި ހުޅުވާ އެސްކްރޯ އެކައުންޓެއްގައި ކަމަށާއި މަޝްރޫޢުގެ ހުރިހާ ފައިސާގެ މުޢާމަލާތެއް ހިންގާނީ ދިވެހި ބޭންކުތައް މެދުވެރިކޮށް ކަމަށް ޒަރީރު ވިދާޅުވިއެވެ.

"މި މަޝްރޫއު އެއްކޮށް ނިމި ގާތްގަނޑަކަށް 10 އަހަރުގެ ތެރޭގައި ފުރިހަމަ އޮޕަރޭޝަނަށް އަންނައިރު އަހަރަކު އެއް މިލިއަނަށްވުރެ ގިނަ ފަތުރުވެރިން ޒިޔާރަތް ކުރާނެ ކަމަށް ލަފާކުރެވޭ. މީގެ ސަބަބުން ރާއްޖޭގެ އިގުތިސޯދަށް ފަތުރުވެރިކަމުގެ ދާއިރާއިން އަހަރަކު ގާތްގަނޑަކަށް ދެ ބިލިއަން ޑޮލަރުގެ އާމްދަނީއެއް ވަންނާނެ" މިނިސްޓަރު ވިދާޅުވިއެވެ.

މިނިސްޓަރު ޒަރީރު ސިފަކުރެއްވި ގޮތުގައި މި މަޝްރޫޢަކީ ރާއްޖޭގެ ފަތުރުވެރިކަމުގެ ސިނާޢަތް އިތުރަށް ހަރުދަނާކޮށް ދިގު މުއްދަތުގެ އިޤުތިޞާދީ ކުރިއެރުމަށް މަގުފަހިކޮށްދޭނެ ކަމެކެވެ.