ބޯ ވާރެޔާއި ފެންބޮޑުވުމުގެ ސަބަބުން އިންޑިއާއާއި ނޭޕާލުން 70 މީހުން މަރުވެއްޖެ

ބޯކޮށް ވާރޭވެހި ފެންބޮޑުވުމާއި ބިންގަނޑު ކަނޑައިގެން ދިއުމުގެ ސަބަބުން އިންޑިއާއިން 56 މީހުންނާއި ނޭޕާލުން 14 މީހުން މަރުވެއްޖެއެވެ.

ނޭޕާލުން 11 މީހަކު ގެއްލިފައިވާ ކަމަށާއި އިތުރަށް ފެންބޮޑުވެދާނެ ކަމުގެ އިންޒާރު އެ ޤައުމުގެ ކަމާ ބެހޭ އިދާރާތަކުން ދީފައިވެއެވެ. އިންޑިއާގެ އުތުރުގެ ސްޓޭޓެއް ކަމަށްވާ އުއްތަރު ޕްރަދޭޝްއަށް މި މަހުގެ 25 އިން 27 އަށް 66.5 މިލިމީޓަރުގެ ވާރޭ ވެހިފައިވާއިރު، މިއީ އެ ދުވަސްވަރު އާންމުކޮށް ވެހޭ 7.6 މިލިމީޓަރާ އަޅައިބަލާއިރު ވަރަށް ބޮޑު އިތުރުވުމެކެވެ.

އިންޑިއާގައި މަރުވި މީހުންގެ އިތުރުން 46 މީހަކަށް އެކި ވަރުގެ އަނިޔާ ލިބިފައިވާއިރު، 1،000 އަށް ވުރެ ގިނަ ގެދޮރަށް ބޮޑެތި ގެއްލުންތައް ލިބިފައިވެއެވެ. އިންޑިއާ ސަރުކާރުން މިހާރު ފެންބޮޑުވެފައިވާ ސަރަޙައްދުތަކުގައި ސަލާމަތީ މަސައްކަތްތައް ކުރިއަށް ގެންދާ ކަމަށާއި ދަނޑުބިންތަކަށް ލިބުނު ގެއްލުންތައް ދެނެގަނެ ބަދަލު ދިނުމުގެ މަސައްކަތް ހިންގަމުން ގެންދާ ކަމަށް ރިޕޯޓުތައް ބުނެއެވެ. ވާރެޔާ ގުޅިގެން އެ ޤައުމުގެ މައި ކޯރުތައް ކަމަށްވާ ގަންގާ، ކޯސީ އަދި ނަރްމަދާގެ ފެންގަނޑު ނުރައްކާތެރި މިންވަރަކަށް އުފުލިފައިވެއެވެ.

ނޭޕާލުގެ 77 ޑިސްޓްރިކްޓުގެ ތެރެއިން 49 ޑިސްޓްރިކްޓަކަށް ކުއްލި ފެންބޮޑުވުމުގެ ނުރައްކާ އޮތް ކަމަށް އެ ޤައުމުގެ ކަމާ ބެހޭ ފަރާތްތަކުން ބުނެފައިވެއެވެ. ފެންބޮޑުވުމާއި ބިންގަނޑު ކަނޑައިގެން ދިއުމުގެ ސަބަބުން މަނަންގް، މުސްތަންގް، މިޔަގްދީ އަދި ބަގްލުންގް ޑިސްޓްރިކްޓުތަކުން ކަރަންޓުގެ ޚިދުމަތް މެދުކެނޑިފައިވެއެވެ. އޭގެ އިތުރުން 40 މެގަވޮޓްގެ ހައިޑްރޯޕަވާ މަޝްރޫޢަކަށާއި މުވާސަލާތީ ވިއުގައަށް ވެސް ބޮޑެތި ގެއްލުންތައް ލިބިފައިވެއެވެ.

ނޭޕާލުގެ އުތުރުގެ މަނަންގް ޑިސްޓްރިކްޓުގައި އޮންނަ ހިމްލުންގް ހިމާލް ފަރުބަދައިގެ ބޭސް ކޭމްޕަށް ސްނޯގަނޑެއް ވެއްޓި، ޓެންޓު ޖެހުމުގެ މަސައްކަތުގައި ތިބި 10 މަސައްކަތްތެރިން ގެއްލިގެން ހޯދުމުގެ މަސައްކަތް ކުރިއަށް ގެންދާ ކަމަށް ވެސް ރިޕޯޓުތައް ބުނެއެވެ.