އިޓަލީގެ ކެފޭ ބާބެރާގެ ފުރަތަމަ އައުޓްލެޓް ހުޅުމާލޭގައި ހުޅުވައިފި

އިޓަލީގެ މަޝްހޫރު ކޮފީ ބްރޭންޑެއް ކަމުގައިވާ ކެފޭ ބާބެރާގެ ރާއްޖޭގެ ފުރަތަމަ ފިހާރަ ހުޅުމާލޭގައި ހުންނަ މެންހެޓަން ގްރޭންޑް ހޮޓެލްގައި މިއަދު ހުޅުވައިފިއެވެ.

ސޮފްޓް އޯޕެނިންގެ ގޮތުގައި ބޭއްވި މި ރަސްމިއްޔާތުގައި އައުޓްލެޓް ރަސްމީކޮށް ހުޅުއްވައިދެއްވީ ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިން ޑައިރެކްޓަރު ބްރިގޭޑިއާ ޖެނެރަލް (ރިޓަޔާޑް) ޢަލީ ޒުހައިރެވެ. އެ ހޮޓެލްގެ ޑައިރެކްޓާ އޮފް އޮޕަރޭޝަންސް ޕެނެގިއޮޓިސް ކެލެންޒިސް ވަނީ ކެފޭ ބާބެރާ އާއި އެ ތަނުން ލިބެން ހުންނާނެ ޚިދުމަތްތައް ތަޢާރަފްކޮށްދީފައެވެ. ވޯލްޑް އޮފް ބިޒްނަސް ޕްރައިވެޓް ލިމިޓެޑުގެ މެނޭޖިން ޑައިރެކްޓަރު ނަޢީމް އާއި އެ ކުންފުނީގެ ޑައިރެކްޓަރުން ވެސް މި ރަސްމިއްޔާތުގައި ބައިވެރިވެފައިވެއެވެ.

މެންހެޓަން ގްރޭންޑް ހޮޓެލްގެ ގްރައުންޑް ފްލޯ ލޮބީގައި ޤާއިމުކޮށްފައިވާ މި ކެފޭއިން ހޫނު އަދި ފިނި ކޮފީގެ ބާވަތްތަކާއި ޕޭސްޓްރީ އާއި ލުއި ކެއުންތައް ލިބެން ހުންނާނެ ކަމަށް އެ ކެފޭއިން ބުނެފައިވެއެވެ. ހޮޓެލުގެ މެހެމާނުންގެ އިތުރުން ހުޅުމާލޭގެ ރައްޔިތުންނަށާއި ޒިޔާރަތްކުރާ ފަރާތްތަކަށް ވެސް ޚިދުމަތް ލިބޭ ގޮތަށް އެ ތަން ވަނީ ފަރުމާކޮށްފައެވެ.

ކެފޭ ބާބެރާއިން ކޮންމެ ދުވަހަކު ހެނދުނު 7:30 އިން ރޭގަނޑު 11:30 އަށް ޚިދުމަތް ދިނުމަށް ވަނީ ނިންމައިފައެވެ.