ބަނގުރާ ވިޔަފާރިކުރި ކަމުގެ ތުހުމަތުގައި މާލެއިން ދެ ބިދޭސީން ހައްޔަރުކޮށްފި

މާލޭގައި ފުޅާ ދާއިރާއެއްގައި ޤަވާއިދާ ޚިލާފަށް ބަނގުރާ ގެންގުޅެ ވިޔަފާރިކުރަމުން ދިޔަ ކަމުގެ ތުހުމަތުގައި އިންޑިއާ ރައްޔިތަކާއި ސްރީލަންކާ ރައްޔިތަކު މި މަހުގެ އެއް ވަނަ ދުވަހު ހައްޔަރުކޮށްފިއެވެ.

ހައްޔަރުކޮށްފައިވަނީ އުމުރުން 44 އަހަރުގެ އިންޑިއާ ރައްޔިތެއް ކަމުގައިވާ ޕެރުމަލް މަޔަވަންއާއި 35 އަހަރުގެ ސްރީލަންކާ ރައްޔިތެއް ކަމުގައިވާ ތުވަން ރިސްލިން ފަލީލް ކަމަށް ފުލުހުން ބުނެފައިވެއެވެ. އެ ދެ މީހުން ހައްޔަރުކުރީ ޑްރަގް އެންފޯސްމަންޓާއި ކައުންޓަރ ނާކޮޓިކްސް އިންޓެލިޖެންސް ގުޅިގެން ހިންގި ޚާއްޞަ އޮޕަރޭޝަނެއްގައެވެ. އެ ދެ މީހުންގެ މައްޗަށް ކުރަނީ ޤަވާއިދާ ޚިލާފަށް ބަނގުރާ ގެންގުޅެ ވިޔަފާރިކުރުމާއި މަސްތުވާތަކެއްޗާއި ބަނގުރާ ބޭނުންކުރުމުގެ ތުހުމަތެވެ.

އެ އޮޕަރޭޝަންގައި ދެ މީހުން ދިރިއުޅެމުން ދިޔަ ތަން ބަލާ ފާސްކުރިއިރު ބަނގުރާ ކަމަށް ބެލެވޭ އެއްޗެއް ހުރި 500 އެމްއެލްގެ 1،677 ފުޅިއާއި ފަސް ލީޓަރުގެ 23 ފުޅި ފެނިފައިވެއެވެ. އޭގެ އިތުރުން މަސްތުވާތަކެތި ކަމަށް ބެލެވޭ އެއްޗެއް ހުރި ދެ ރަބަރު ޕެކެޓުވެސް ފެނިފައިވެއެވެ.

މައްސަލައިގެ އިޖުރާއަތުތައް ފުރިހަމަކުރުމަށް ފަހު އެ ދެ މީހުން މިހާރު ވަނީ އިމިގްރޭޝަން ޤާނޫނުގެ ދަށުން ފިޔަވަޅު އެޅުމަށް މޯލްޑިވްސް އިމިގްރޭޝަނާ ހަވާލުކޮށްފައި ކަމަށް ފުލުހުން ބުނެފައިވެއެވެ.