ޔޫއާރުއޭގެ ބޯޑު ހަތް މެންބަރުންނަށް ބޮޑުކުރާ ބިލު މަޖިލީހުން ފާސްކޮށްފި

ޔުޓިލިޓީ ރެގިއުލޭޓަރީ އޮތޯރިޓީ (ޔޫއާރުއޭ) ގެ ބޯޑު މެންބަރުންގެ ޢަދަދު ފަހަކުން ހަތަކަށް އިތުރުކުރުމާ އެކު 11 އިސްލާޙެއް ހިމެނޭ ބިލު 61 މެންބަރުންގެ ވޯޓުން ރައްޔިތުންގެ މަޖިލީހުން މިއަދު ފާސްކޮށްފިއެވެ.

ވިލުފުށި ދާއިރާގެ މެންބަރު ޙަސަން ވަޙީދު ސަރުކާރުގެ ފަރާތުން ހުށަހެޅުއްވި މި ބިލު ދިރާސާކުރީ މަޖިލީހުގެ އެންވަޔަރަމަންޓް އެންޑް ކްލައިމެޓް ޗޭންޖު ކޮމިޓީންނެވެ. އެ ކޮމިޓީން ނިންމީ ސަރުކާރުން ހުށަހެޅި އިސްލާޙުތަކާ އެކު ބިލު ފާސްކުރަން ފެންނަ ކަމަށެވެ. ބިލާ ދެކޮޅަށް ހަ މެންބަރަކު ވޯޓު ދެއްވިއެވެ.

މިހާރު ޤާނޫނު އޮންނަ ގޮތުން ޔޫއާރުއޭގެ ބޯޑުގައި ތިއްބަވަނީ ފަންނީ ތަޢުލީމާއި ތަޖުރިބާ ލިބިވަޑައިގެންފައިވާ ފަސް މެންބަރުންނެވެ. އިސްލާޙުގައިވާ ގޮތުން ޗީފް އެގްޒެކެޓިވް ހިމެނޭހެން ބޯޑަށް ހަތް މެންބަރަކު އައްޔަންކުރައްވާނެއެވެ. ޗީފް އެގްޒެކެޓިވް ފިޔަވައި ދެން ތިއްބަވާ ހުރިހާ ބޭފުޅުންނަކީ ވެސް ކަނޑައެޅިފައިވާ ދާއިރާތަކުން ފަންނީ ޤާބިލުކަން ހުރި ފަރާތްތަކަށް ވާންޖެހެއެވެ.

ބޯޑު މެންބަރުންގެ ދައުރާ ގުޅޭ ގޮތުން ވެސް ބިލުގައި ބަދަލުތަކެއް ހިމެނެއެވެ. ކުރިން ޤާނޫނުގައި އޮތީ ފަސް އަހަރުގެ އެއް ދައުރަށް އެކަނި އައްޔަންކުރެވޭ ގޮތަށެވެ. ނަމަވެސް އިސްލާޙުގައިވާ ގޮތުން ޗީފް އެގްޒެކެޓިވް ފިޔަވައި ބޯޑުން ވަކިނުކޮށް ތިއްބެވި މެންބަރުންނަށް އެއް ދައުރަށް ވުރެ ގިނަ ދައުރަށް ތިއްބެވުމުގެ ފުރުޞަތު ލިބޭނެއެވެ. މީގެ އިތުރުން ބޯޑުގެ ނިންމުންތަކުގައި ޗީފް އެގްޒެކެޓިވަށް ވޯޓު ލެއްވުމުގެ ޙައްޤު ނޯންނާނެ ކަމަށް ވެސް ބިލުގައި ކަނޑައަޅާފައިވެއެވެ.

ރައީސުލްޖުމްހޫރިއްޔާ މި ބިލު ތަޞްދީޤުކުރެއްވުމާ އެކު ބޯޑަށް އިތުރަށް ބޭނުންވާ މެންބަރުން 30 ދުވަހުގެ ތެރޭގައި އައްޔަންކުރައްވަންޖެހޭނެއެވެ.