ހިޔާވަހި ލޯނު ސްކީމުން 244 މީހަކަށް ފައިސާ ދޫކޮށް އިތުރު 629 މީހަކަށް ލޯނު ދޫކުރަނީ

ބޯހިޔާވަހިކަމަށް ކުޑަ އިންޓްރެސްޓް ރޭޓެއްގައި ލޯނު ދޫކުރާ ހިޔާވަހި ފައިނޭންސިން ސްކީމުގެ ދަށުން 244 ފަރާތަކަށް ލޯނު ދީ ކުރިއަށް އޮތް މަހެއްހާ ދުވަހުގެ ތެރޭގައި އިތުރު 629 ފަރާތަކަށް ލޯނު ދޫކުރާނެ ކަމަށް ބޯހިޔާވަހިކަމާ ބެހޭ ވުޒާރާގެ ސްޓޭޓް މިނިސްޓަރު އަހުމަދު ނާޒިމް މުހައްމަދު ވިދާޅުވެއްޖެއެވެ.

ދައުލަތުގެ މީޑިއާގެ ޕްރޮގްރާމެއްގައި ވާހަކަ ދައްކަވަމުން ނާޒިމް ވިދާޅުވީ މިދިޔަ އަހަރުގެ އެޕްރީލް 30 ވަނަ ދުވަހު އެ ސްކީމަށް ހުށަހެޅުމުގެ ފުރުސަތު ބަންދުވިއިރު ޖުމްލަ 2256 އެޕްލިކޭޝަން ހުށަހެޅުނު ކަމަށެވެ. ބޭންކުތަކާއި ހައުސިން ވުޒާރާ އާއި ހުށަހެޅި ފަރާތްތައް ގުޅިގެން ތަފާތު މަރުހަލާތަކުގައި ބެލުމަށް ފަހު 891 ފޯމެއް އެޕްރޫވް ކޮށްފައިވާ ކަމަށެވެ. އެ 891 ފަރާތަށް މި އަހަރު ނިމުމުގެ ކުރިން ލޯނު ދޫކުރައްވާނެ ކަމަށް ވެސް ވިދާޅުވިއެވެ.

"އޭގެ ތެރެއިން މިހާރު އަޅުގަނޑުމެން ވާނީ 629 މީހަކަށް ލޯނު ދޫކުރުމަށް އެންމެ ފަހުގެ މަރުހަލާގެ ތައްޔާރީތައް ވެފައި. 244 ފަރާތަކަށް މިހާރު ވާނީ ލޯނު ދޫކޮށްފައި. އެެހެންވީމަ ކުރިއަށް އޮތް މަހެއްހާ ދުވަހުގެ ތެރޭގައި އަޅުގަނޑުމެންނަށް ބާކީ އޮތް 629 މީހުންނަށް ވެސް ލޯނު ދޫކުރެވިގެން ދާނެ" ނާޒިމް ވިދާޅުވިއެވެ.

ނާޒިމް ވިދާޅުވީ ސްކީމަށް ހުށަހެޅި ގިނަ ބައެއްގެ ކުރެހުންތައް އުސޫލާ އެއްގޮތް ނުވުމުގެ ސަބަބުން ބައެއް ދަތިތައް ކުރިމަތިވި ކަމަށެވެ. އުސޫލު ބުނާ ގޮތުން އިމާރާތުގެ 20 އިންސައްތައަށް ވުރެ ބޮޑު ބައެއް ކޮމާޝަލް ބޭނުމަށް ޚާއްޞަ ނުކުރެވޭނެ ކަމަށާއި ބާކީ ބައި ދިރިއުޅުމުގެ ބޭނުމަށް ކަނޑައަޅަން ޖެހޭ ކަމަށެވެ. ނަމަވެސް ގިނަ ފޯމުތައް ހުށަހެޅީ އެ މިންގަނޑާ ޚިލާފަށް ކަމުން އެކަން ރަނގަޅު ކުރުމަށް ވަގުތު ނެގި ކަމަށެވެ.

އެ ސްކީމުގައި ތިން ކެޓަގަރީއެއް ހިމެނެއެވެ. ހުރިހާ ރަށަކަށް ހުޅުވައިލެވޭ "ރަށްވެހި" ކެޓަގަރީން ގިނަވެގެން އެއް މިލިއަން ރުފިޔާގެ ލޯނެއް ލިބޭއިރު އެ ކެޓަގަރީން 363 ފޯމެއް ވަނީ އެޕްރޫވް ކޮށްފައެވެ. އާބަން ސަރަހައްދުތަކަށް ޚާއްޞަ "ސަހަރު" ކެޓަގަރީން ތިން މިލިއަން ރުފިޔާ ލިބޭއިރު 438 ފޯމެއް ފާސްކޮށްފައިވެއެވެ. މާލެ ސަރަހައްދަށް ޚާއްޞަ "ފަހިމާލެ" ކެޓަގަރީން ހަ މިލިއަން ރުފިޔާއާ ހަމައަށް ލިބޭ ގޮތަށް 40 ލޯނެއް ވަނީ ފާސްކޮށްފައެވެ.

ބީއެމްއެލް އާއި އެޗްޑީއެފްސީ އަދި އެމްއައިބީ މެދުވެރިކޮށް ހިންގާ މި ސްކީމުން ލޯނު ދޫކުރަނީ ފަހެއް އާއި 10 އިންސައްތައާ ދެމެދުގެ އިކުއިޓީ ރޭޓެއްގައެވެ. ލޯނު އަނބުރާ ދެއްކުމަށް 25 އަހަރުގެ މުއްދަތެއް ކަނޑައަޅާފައިވާއިރު ރަށްވެހި ކެޓަގަރީގެ ލޯނު ނަގާ ފަރާތްތަކުން އިކުއިޓީގެ ގޮތުގައި އެއްވެސް ފައިސާއެއް ދައްކާކަށް ނުޖެހެއެވެ. ސަހަރު ކެޓަގަރީގެ އިކުއިޓީ އަކީ ފަސް އިންސައްތަ ކަމަށް ވާއިރު ފަހިމާލެ ކެޓަގަރީން 10 އިންސައްތަ ބަހައްޓަން ޖެހެއެވެ.

ނާޒިމް ވިދާޅުވި ގޮތުގައި މި ސްކީމަކީ ވަރަށް ކާމިޔާބު މަޝްރޫޢެއް ކަމަށާއި މީގެ ދަށުން ޖުމްލަ އެއް ބިލިއަން ރުފިޔާގެ ލޯނު ދޫކުރެވޭނެ ކަމަށެވެ. މީގެ އިތުރުން މިފަދަ އެހެން މަޝްރޫޢެއް ކުރިއަށް އޮތް ދެ މަހެއްހާ ދުވަހުގެ ތެރޭގައި އިފްތިތާހު ކުރެވޭނެ ކަމަށް ވެސް ވިދާޅުވިއެވެ.