ޑރ. މަހާތީރުގެ އަނބިކަނބަލުން އަވަހާރަވުމުން ރައީސް ތައުޒިޔާ ފޮނުއްވައިފި

މެލޭޝިއާގެ ކުރީގެ ބޮޑުވަޒީރު ޑރ. މަހާތީރު މުޙައްމަދުގެ އަނބިކަނބަލުން ޢުމުރުފުޅުން 100 އަހަރުގައި އަވަހާރަވުމާ ގުޅިގެން ރައީސް ޑރ. މުޙައްމަދު މުޢިއްޒު ތައުޒިޔާގެ މެސެޖެއް ފޮނުއްވައިފިއެވެ.

އަވަހާރަވީ ޑރ. ސިޓި ޙަސްމާ މުޙައްމަދު ޢަލީއެވެ. ރައީސް ފޮނުއްވި މެސެޖުގައި އެ ކަމަނާއަކީ މެލޭޝިއާގައި ޑޮކްޓަރުކަމުގެ ދާއިރާއަށް ވެދެވަޑައިގެންނެވި އެންމެ ފުރަތަމަ އަންހެން ބޭފުޅުންގެ ތެރެއިން ބޭފުޅެއް ކަމަށް ވިދާޅުވެ، އެ ކަމަނާގެ ޚިދުމަތްތަކަށް ތައުރީފުކުރައްވާފައިވެއެވެ. މައިންގެ ޞިއްޙީ ޙާލަތު ރަނގަޅުކުރެއްވުމާއި ރަށްފުށު ސަރަޙައްދުތަކުގައި ދިރިއުޅޭ އަންހެނުންގެ ފެންވަރު މަތިކުރެއްވުމަށް އެ ކަމަނާ ކުރެއްވި މަސައްކަތްތައް ވެސް ރައީސް ފާހަގަކުރައްވާފައިވެއެވެ.

މީގެ އިތުރުން މިންތީގެ ހަމަހަމަކަން ޤާއިމުކުރެއްވުމާއި ޢާއިލާތަކުގެ ދިރިއުޅުމުގެ ފެންވަރު ރަނގަޅުކުރެއްވުމަށް އެ ކަމަނާގެ އިސްނެންގެވުމުގެ ދަށުން ކުރިއަށް ގެންދެވި މަޝްރޫޢުތަކަށް ވެސް ރައީސްގެ މެސެޖުގައި އަލިއަޅުއްވައިލައްވާފައިވެއެވެ. މި ހިތާމައިގެ ވަގުތުގައި ޝުކުރުވެރިކަމާއި ޤަދަރާ އެކީ އެ ކަމަނާގެ ހަނދާނުގައި ދެމިހުންނަވާނެ ކަމަށް ރައީސް ވިދާޅުވެފައިވެއެވެ.

ރައީސް ވަނީ ދިވެހި ސަރުކާރާއި ރައްޔިތުންގެ ނަމުގައި ޑރ. މަހާތީރަށާއި އެ މަނިކުފާނުގެ ޢާއިލާއަށް ތައުޒިޔާ ދަންނަވައި ކެތްތެރިކަން ދެއްވުން އެދި ދުޢާ ކުރައްވާފައެވެ.

ޑރ. ސިޓި ޙަސްމާގެ ޖަނާޒާ ބާއްވައި ފަސްދާނުލައްވާފައި ވަނީ މެލޭޝިއާގެ ވެރިރަށް ޕުތުރަޖާޔާގެ ޤަބުރުސްތާނެއްގައެވެ. މާތް ﷲ އެ ކަމަނާއަށް ރަޙްމަތް ލައްވާށިއެވެ.