ހޯރަފުށީގައި ސައިކަލެއްގެ ފުރޮޅު ފަޅައިގެން ގޮސް ދެ އަންހެނަކަށް އަނިޔާވެއްޖެ

ހއ. ހޯރަފުށީ އެއާޕޯޓް މަގުން ދުއްވާފައި ދިޔަ ސައިކަލެއްގެ ފަހަތު ފުރޮޅުގެ ހަން ފަޅައިގެން ގޮސް ސައިކަލު ވެއްޓި ހިނގި އެކްސިޑެންޓެއްގައި ދެ އަންހެނަކަށް އަނިޔާވެ، އެ ތެރެއިން އެކަކު އިތުރު ފަރުވާއަށް މާލެ ގެނެސްފިއެވެ.

ފުލުހުންގެ މީޑިއާ އޮފިޝަލާ ހަވާލާދީ ބުނެފައިވާ ގޮތުގައި، މި ހާދިސާގެ މަޢުލޫމާތު ފުލުހުންނަށް ލިބިފައިވަނީ 26 ސެޕްޓެމްބަރު 2026 ވީ ދުވަހުގެ ރޭ 12:33 ހާއިރުއެވެ. އެއާޕޯޓް މަގުން ދެކުނުން އުތުރަށް ދުއްވާފައި ދިޔަ ސައިކަލުގެ ފަހަތު ފުރޮޅުގެ ހަން ފަޅައިގެން ދިއުމާ ގުޅިގެން ސައިކަލު ވެއްޓުނީ ކަމަށް އޮފިޝަލް ވިދާޅުވެފައިވެއެވެ.

މި ހާދިސާގައި އަނިޔާވެފައިވަނީ ސައިކަލު ދުއްވަން އިން 43 އަހަރުގެ އަންހެނަކަށާއި ފަހަތުގައި އިން 36 އަހަރުގެ އަންހެނަކަށެވެ. ދެ މީހުންނަށް ވެސް އެ ރޭ ކުޅުދުއްފުށީ ރީޖަނަލް ހޮސްޕިޓަލުގައި ފަރުވާ ދީފައިވެއެވެ.

ނަމަވެސް ސައިކަލުގެ ފަހަތުގައި އިން 36 އަހަރުގެ އަންހެން މީހާއަށް އިތުރު ފަރުވާ ބޭނުންވެގެން މާލެ ގެނެސް އައިޖީއެމް ހޮސްޕިޓަލުގައި މިހާރު ފަރުވާ ދެމުންދާ ކަމަށް ފުލުހުންގެ އޮފިޝަލް ވިދާޅުވެފައިވެއެވެ.