ޑައުންސިންޑްރޮމް ކުއްޖަކަށް ފަސް ސުކޫލުން ފުރުސަތު ނުދިން މައްސަލަ ބައްލަވާނެ ކަމަށް ރައީސް ވިދާޅުވެއްޖެ

ޑައުންސިންޑްރޮމް ހުންނަ ކުއްޖަކަށް ފަސް ސުކޫލަކުން ޖާގަ ދޭން ދެކޮޅު ހެދި މައްސަލައާ ގުޅިގެން އެ ކުއްޖާއަށް ހަމަހަމަ ފުރުސަތު ހޯއްދަވައިދެއްވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.

ރައީސް މި ޔަގީންކަން ދެއްވީ "ރައްޔިތުންގެ އަޑު" ސިލްސިލާގެ ތެރެއިން އެ ކުއްޖާގެ ބެލެނިވެރިޔާ ފާތިމަތު ފައިރޫޒާ އާދަމާ ބައްދަލުކުރައްވައި، އޭނާގެ ކަންބޮޑުވުންތައް އަޑުއެއްސެވުމަށް ފަހުގައެވެ. ބައިގަޑިއެއްހާ އިރު ދިގުދެމިގެން ދިޔަ އެ ބައްދަލުވުމުގައި ފައިރޫޒާ ވަނީ ތައުލީމީ ނިޒާމުގައި އެ ފަދަ ކުދީންނަށް ހަމަހަމަ ފުރުސަތު ނެތް ކަމުގެ ކަންބޮޑުވުން ހިއްސާކޮށްފައެވެ. ފައިރޫޒާ ބުނީ އޭނާގެ ދަރިފުޅަކީ ޑައުންސިންޑްރޮމް ކުއްޖަކަށްވުމުން ފަސް ސުކޫލަކުން ފުރުސަތުދޭން ދެކޮޅު ހެދި ކަމަށެވެ.

ފައިރޫޒާގެ ކަންބޮޑުވުންތައް އަޑުއެއްސެވުމަށް ފަހު ރައީސް ވިދާޅުވީ އެ ހުރިހާ ކަމަކަށް އެޑްރެސް ކުރައްވާނެ ކަމަށެވެ. ޚާއްޞަކޮށް ތައުލީމީ ނިޒާމުގައި ހުރި މައްސަލަތަކަށް ހައްލު ހޯއްދަވައިދެއްވާނެ ކަމުގެ ޔަގީންކަން ރައީސް ދެއްވައިފައިވެއެވެ.

"ރައްޔިތުންގެ އަޑު" އަކީ ރައީސުލްޖުމްހޫރިއްޔާއާ ބައްދަލުކުރައްވަން ބޭނުންވާ ފަރާތްތަކާ ވަކިވަކިން ބައްދަލުކުރައްވައި، ވީހާ ވެސް ފުޅާ ދާއިރާއެއްގައި ރައްޔިތުންގެ ޝަކުވާތައް އަޑުއެއްސެވުމަށް ރައީސް ފަށްޓަވާފައިވާ ސިލްސިލާއެކެވެ.