ޖިންސީ ފުރައްސާރައިގެ ތުހުމަތުގައި މީހަކު ހޯދުމަށް ފުލުހުން ވީޑިއޯ އާންމުކޮށްފި

ޖިންސީ ފުރައްސާރައިގެ މައްސަލައެއްގައި ތުހުމަތުކުރެވޭ މީހަކު ދެނެގަތުމަށް ފުލުހުން ސީސީޓީވީ ވީޑިއޯ ފުޓޭޖެއް އާންމުކޮށް، އެ މީހާއާ ބެހޭ މަޢުލޫމާތު ހިއްސާކޮށްދިނުމަށް އާންމުންގެ ކިބައިން އެދިއްޖެއެވެ.

ފުލުހުން ސޯޝަލް މީޑިއާގައި އާންމުކުރި ވީޑިއޯއިން ފެންނަނީ ދަބަހެއް އަޅުވައިގެން ހުރި ފިރިހެނަކު ރޭގަނޑު 7:34 ހާއިރު ގެއަކަށް ވަދެ، ގާތްގަނޑަކަށް ދެ މިނެޓު ފަހުން 7:36 ހާއިރު އެ ގެއިން ނުކުންނަ މަންޒަރެވެ. އެ ގެއިން ނުކުތުމަށް ފަހު މަގުމަތީގައި މަޑުކޮށްލައިގެން ދެ ފަރާތަށް ބަލަން ހުންނަ މަންޒަރު ވެސް ވީޑިއޯއިން ފެނެއެވެ.

ފުލުހުން ބުނީ އެ މީހާއަކީ ފެމިލީ އެންޑް ޗައިލްޑް ޕްރޮޓެކްޝަންގެ ފެމިލީ އެންޑް ޖެންޑާ އެފެއާޒް ޑިޕާޓްމެންޓުން ތަޙުޤީޤުކުރަމުންދާ ޖިންސީ ފުރައްސާރައިގެ މައްސަލައެއްގައި ތުހުމަތުކުރެވޭ މީހެއް ކަމަށެވެ. އެ މީހާއަކީ ކާކުކަން މިހާތަނަށް ދެނެގަނެވިފައި ނުވާ ކަމަށް ވެސް ފުލުހުން ބުނެފައިވެއެވެ.

އެ މީހާއާ ބެހޭ އެއްވެސް މަޢުލޫމާތެއް ލިބިފައިވާ ނަމަ ފުލުހުންގެ ނަންބަރު 3322111 ނުވަތަ 9790163 އަށް ގުޅައި ހިއްސާކޮށްދިނުމަށް ފުލުހުން ވަނީ އެދިފައެވެ.