އެފްޑީސީގެ 4،000 ޔުނިޓުގެ ތެރެއިން 74 ޔުނިޓް ހަވާލުނުކުރެވި އެބައޮތް

ގެދޮރުވެރިޔާ ސްކީމުގެ ދަށުން ހުޅުމާލޭގައި ފަހި ދިރިއުޅުން ކޯޕަރޭޝަން (އެފްޑީސީ) އިން ބިނާކުރި 4،000 ހައުސިން ޔުނިޓުގެ ތެރެއިން 74 ޔުނިޓް ތަފާތު ސަބަބުތަކާ ހެދި ހަވާލުނުކުރެވި ހުރިކަން އެ ކުންފުނިން ޢާންމުކުރި ތަފާސްހިސާބުތަކުން ހާމަވެއްޖެއެވެ.

އެފްޑީސީގެ އަމާން ދޯދި އަދި އަމާން އުދަރެހުގެ ޓަވަރުތަކުގައި ހިމެނޭ ޔުނިޓްތަކުގެ ތެރެއިން މިހާތަނަށް ހަވާލުކޮށް ނިމިފައިވަނީ 3،926 ޔުނިޓެވެ. ހަވާލުނުކުރެވި ހުރި 74 ޔުނިޓް ހަވާލުނުކުރެވެނީ ޤާނޫނީ ސަބަބުތަކާއި އެ ނޫން ވެސް ސަބަބުތަކާ ހެދި ކަމަށް އެ ކުންފުނީގެ ތަފާސްހިސާބުތަކުން ދައްކައެވެ.

ކުލި ދެއްކުމުގެ ރެކޯޑަށް ބަލާއިރު، އެ 4،000 ޔުނިޓުގެ ތެރެއިން ގަވާއިދުން ކުލި ދައްކަމުން އަންނަނީ 3،362 ޔުނިޓުންނެވެ. ގަވާއިދުން ކުލި ނުދައްކާ ޔުނިޓުތަކުގެ ޢަދަދު 564 ގައި އޮތް އިރު، ކުރިން ބޯހިޔާވަހިކަމަށް ދޫކޮށްފައިވާ ތަންތަނާ އަޅައިބަލާއިރު އެފްޑީސީގެ ޔުނިޓުތަކުގެ ކުލި ދެއްކުމުގެ ރޭޓު ރަނގަޅު ކަމަށް އެ ކުންފުނީގެ ތަފާސްހިސާބުތަކުން ދައްކައެވެ.

ބޯހިޔާވަހިކަމުގެ ސްކީމުތަކުން ދޫކުރާ ފްލެޓުތަކަށް ކުލި ނުދެއްކުމުގެ މައްސަލަ ރާއްޖޭގައި ބޮޑުވެ، ކުލި ނުދައްކާ ފަރާތްތަކަށް ލޯނު ނުނެގޭ ގޮތަށް ވަނީ އުސޫލެއް ޤާއިމުކޮށްފައެވެ. ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ބަލަހައްޓާ ހިޔާ ޓަވަރުތަކަށް އެކަނި ބެލި ނަމަވެސް މިދިޔަ އަހަރުގެ ޖުލައިގެ ނިޔަލަށް ކުލީގެ ގޮތުގައި 890 މިލިއަނަށް ވުރެ ގިނަ ރުފިޔާ ނުލިބި ހުރިކަން ތަފާސްހިސާބުތަކުން ދައްކައެވެ.