ވަތަނީ ޚިދުމަތުގެ ފުރަތަމަ އަހަރު 1،000 ޒުވާނުން ތަމްރީނުކުރުމުގެ ލަނޑުދަނޑި ހާސިލުކޮށްފި

ދިވެހި ވަތަނީ ޚިދުމަތުގެ ޕްރޮގްރާމަށް މިއަދު އެއް އަހަރު ފުރުމާ ގުޅިގެން، ފުރަތަމަ އަހަރު 1،000 ޒުވާނުން ތަމްރީނުކުރުމަށް ކަނޑައެޅި ލަނޑުދަނޑި ހާސިލުކުރެވިފައިވާ ކަމަށް ސަރުކާރުން ބުނެފިއެވެ.

މި ޕްރޮގްރާމުގެ ތެރެއިން ނޭޝަނަލް ސާވިސް އިނީޝަލް ޓްރޭނިންގައި 1،028 ޒުވާނުން ތަމްރީނުކޮށްފައިވާ އިރު، ނޭޝަނަލް ސާވިސް ސްކިލް ޓްރޭނިންގ ޕްރޮގްރާމުން އިތުރު 136 ޒުވާނުން ތަމްރީނު ފުރިހަމަކޮށްފައިވެއެވެ. މި މުނާސަބާގައި ސަރުކާރުން ވަނީ ތަމްރީނު ފުރިހަމަކުރި ޒުވާނުންނަށާއި އެ ޒުވާނުންގެ ޢާއިލާތަކަށް ތަހުނިޔާ ދަންނަވައި، ޕްރޮގްރާމް ހިންގުމުގައި ބައިވެރިވި ހުރިހާ ފަރާތްތަކަށް ޝުކުރު އަދާކޮށްފައެވެ.

ރައީސް ޑރ. މުޙައްމަދު މުޢިއްޒު މި މުނާސަބަތާ ގުޅިގެން އެކްސްގައި ކުރެއްވި ޕޯސްޓެއްގައި ވިދާޅުވީ ވަތަނީ ޚިދުމަތުގެ ކުރިމަގު ފެނިވަޑައިގަންނަވަނީ ވަރަށް އުޖާލާކޮށް ކަމަށެވެ.

ކުރިއަށް އޮތް ތަނުގައި ނޭޝަނަލް ސާވިސްގެ ތެރެއަށް އިތުރު ފަންނީ ދާއިރާތައް ތަޢާރަފުކޮށް، އިންޓާންޝިޕް ޕްރޮގްރާމްތައް ފެށުމަށް ސަރުކާރުން ރާވާފައިވެއެވެ. އޭގެ އިތުރުން ތަމްރީނު ފުރިހަމަކުރާ ޒުވާނުންނަށް ވަޒީފާގެ މަގު ތަނަވަސްކޮށްދިނުމަށް ވެސް ސަރުކާރުން ރާވައެވެ.

ދިވެހި ޒުވާނުންގެ ކުރިމަގު ބައްޓަންކުރުމުގެ މަޤުޞަދުގައި ފެށި މި ޕްރޮގްރާމު އިފުތިތާހުކޮށްފައިވަނީ 2025 ވަނަ އަހަރުގެ އޮކްޓޫބަރު އެއް ވަނަ ދުވަހުއެވެ.