ތެލުގެ ޚަރަދަށް ލުޔެއް ހޯދުމަށް އޭޑީބީން 50 މިލިޔަން ޑޮލަރުގެ ލޯނެއް ނަގައިފި

ދުނިޔޭގެ ބާޒާރުގައި ތެލުގެ އަގު އުފުލެމުންދާ ދަނޑިވަޅެއްގައި ދައުލަތުގެ ބަޖެޓަށް ލުޔެއް ހޯދައިދިނުމުގެ ގޮތުން އޭޝިއަން ޑިވެލޮޕްމަންޓް ބޭންކް (އޭޑީބީ) އާ އެކު 50 މިލިޔަން އެމެރިކާ ޑޮލަރުގެ ލޯނު އެއްބަސްވުމެއްގައި ދިވެހި ސަރުކާރުން މިއަދު ސޮއިކޮށްފިއެވެ.

"އެނާޖީ ސެކިއުރިޓީ އެމަޖެންސީ އެސިސްޓެންސް ޕްރޮޖެކްޓް" ގެ ނަމުގައި ހިންގާ މި މަޝްރޫޢުގެ ލޯނު އެއްބަސްވުމުގައި ސަރުކާރު ތަމްސީލުކުރައްވައި ސޮއިކުރެއްވީ މާލީ ކަންކަމާއި ސަރުކާރު ކުންފުނިތަކާ ބެހޭ ވަޒީރު ޙަސަން ޒަރީރެވެ.

އެ މަޝްރޫޢާ ގުޅޭ ޕްރޮޖެކްޓް އެގްރީމެންޓުގައި ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަދި ޗީފް އެގްޒެކެޓިވް އޮފިސަރު ޝިމާދު އިބްރާހީމެވެ. އޭޑީބީގެ ފަރާތުން ދެ އެއްބަސްވުމުގައި ސޮއިކުރެއްވީ އެ ބޭންކުގެ ރީޖަނަލް ހެޑް އޮފް ރީޖަނަލް ކޯޕަރޭޝަން އެންޑް އިންޓިގްރޭޝަން ޔުނިޓް ޑރ. ތިއަމް ހީ އަންގެވެ.

މާލީ ކަންކަމާއި ސަރުކާރު ކުންފުނިތަކާ ބެހޭ ވުޒާރާއިން ބުނީ މެދުއިރުމަތީގެ ހަމަނުޖެހުންތަކުގެ ސަބަބުން ދުނިޔޭގެ ތެލުގެ ބާޒާރުގައި އަގު މައްޗަށް ޖެހި ދައުލަތުން ތެލަށް ކުރާ ހޭދަ ބޮޑުވެފައިވާ ކަމަށެވެ. އެ ވުޒާރާއިން ފާހަގަކޮށްފައިވާ ގޮތުގައި މި ލޯނު ފެސިލިޓީ އަކީ މަލްޓިލެޓަރަލް ބޭންކުތައް މެދުވެރިކޮށް ކޮންސެޝަނަލް ރޭޓުތަކުގައި ފައިނޭންސިން ހޯދުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން ހަމަޖެހުނު ފައިނޭންސިންއެކެވެ.

މިފަދަ ލުއި ޝަރުތުތަކެއް ހިމެނޭ ލޯނު ފެސިލިޓީތަކުގެ ސަބަބުން ސަރުކާރުގެ ދަރަނީގެ ދެމެހެއްޓެނިވިކަން ކަށަވަރުކުރުމަށް އެހީތެރިވެދޭނެ ކަމަށް އެ ވުޒާރާއިން ބުނެފައިވެއެވެ. ސޮއިކުރުމުގެ ރަސްމިއްޔާތުގައި އެ ވުޒާރާ އާއި އެސްޓީއޯގެ އިތުރުން އޭޑީބީގެ އިސްވެރިން ބައިވެރިވެވަޑައިގެންނެވިއެވެ.