ރިޒޯޓު ކުއްޔަށް ދޫކުރާ މުއްދަތު 99 އަހަރަށް ބަދަލުކުރީ ޔާމީންގެ ވެރިކަމުގައި ކަމަށް ވިދާޅުވެ އުޝާމް ރައްދުދެއްވައިފި

ރަސްމާލެ މަޝްރޫޢާ ގުޅޭ ގޮތުން ކުރީގެ ރައީސް ޢަބްދުﷲ ޔާމީން ދެއްކެވި ވާހަކަފުޅަށް ރައްދުދެއްވައި، ޓޫރިސްޓް ރިޒޯޓުތައް ކުއްޔަށް ދޫކުރާ މުއްދަތު 99 އަހަރަށް އިތުރުކުރީ ޚުދު އެ މަނިކުފާނުގެ ވެރިކަމުގައި ކަމަށް ބަންޑާރަނައިބު އަޙުމަދު އުޝާމް ވިދާޅުވެއްޖެއެވެ.

ޕީއެންއެފުން ރޭ ބޭއްވި ޖަލްސާގައި ރައީސް ޔާމީން ވިދާޅުވެފައިވަނީ ރަސްމާލެ 99 އަހަރަށް ބޭރު ބަޔަކަށް ދިނުމަކީ ދާއިމީ ގޮތެއްގައި އެ ބިން ވިއްކައިލުން ކަމަށެވެ. އެކަން ހުއްޓައިނުލައިފި ނަމަ ސަރުކާރު ބަދަލުވުމާ އެކު އެ ކަމުގައި ބައިވެރިވި ސަރުކާރުގެ އިސް ވެރީންނަށް އަދަބު ދެއްވާނެ ކަމުގެ އިންޒާރު ވެސް އެ މަނިކުފާނު ވަނީ ދެއްވައިފައެވެ.

އެ ވާހަކަތަކަށް ރައްދުދެއްވައި ބަންޑާރަނައިބު ވިދާޅުވީ ރާއްޖޭގައި ޓޫރިޒަމާ ބެހޭ ޤާނޫނެއް ފުރަތަމަ އެކުލަވައިލީ 1999 ވަނަ އަހަރު ކަމަށާއި، އެ ޤާނޫނުގެ ދަށުން ރިޒޯޓުތައް ކުއްޔަށް ދޫކުރެވެމުން ދިޔައީ ގިނަވެގެން 25 އަހަރުގެ މުއްދަތަށް ކަމަށެވެ. އެ މުއްދަތު 50 އަހަރަށް ދިގުދެންމީ 2010 ވަނަ އަހަރު ރައީސް ނަޝީދުގެ ދައުރުގައި ގެނައި އިޞްލާޙަކުން ކަމަށާއި، 2015 ވަނަ އަހަރު ރައީސް ޔާމީންގެ ވެރިކަމުގައި 99 އަހަރަށް އެ މުއްދަތު އިތުރުކޮށްފައިވާ ކަމަށް ވެސް އުޝާމް ވިދާޅުވިއެވެ.

ޓޫރިޒަމާ ބެހޭ ޤާނޫނުގެ އަށް ވަނަ މާއްދާ ބަޔާންކުރާ ގޮތުން 99 އަހަރުގެ ކުއްޔެއްގެ މުއްދަތު ހަމަވެއްޖެ ނަމަ އެ ރަށެއްގައި ކޮށްފައިވާ އިންވެސްޓްމެންޓުގެ އަގުން ކުލި ކެނޑުމަށް ފަހު ބާކީ ޖެހޭ ޢަދަދު ސަރުކާރުން އިންވެސްޓަރަށް އަދާކުރަން ޖެހެއެވެ.

ރަސްމާލެ މަޝްރޫޢާ ގުޅޭ ގޮތުން ބަންޑާރަނައިބު ވިދާޅުވީ އެ މަޝްރޫޢު ހިނގާނީ މިހާރު އެކުލަވައިލަމުން އަންނަ ރިއަލް އެސްޓޭޓް ޤާނޫނުގެ ދަށުން ކަމަށެވެ. މިހާތަނަށް ސޮއިކޮށްފައިވަނީ ހަމައެކަނި ކޮމާޝަލް ޓާމްސް އެގްރީމެންޓެއް، އެބަހީ ލެޓާ އޮފް އިންޓެންޓެއްގައި ކަމަށާއި، މަޝްރޫޢު ފެށުމުގެ ކުރިން އެ ޓާމްސްތަކުގެ މައްޗަށް ބިނާކޮށް އިތުރު މަޝްވަރާ ކުރެވި ޑެފިނިޓިވް އެގްރީމެންޓްތަކެއްގައި ސޮއިކުރަންޖެހޭ ކަމަށާއި، އެ ކަމާ ގުޅުން ހުރި ޤާނޫނުތައް ރައްޔިތުންގެ މަޖިލީހުން ފާސްކުރަން ޖެހޭނެ ކަމަށް ވެސް ވިދާޅުވިއެވެ. ޤާނޫނުއަސާސީއާއި ޤާނޫނުތަކާ ޚިލާފު އެއްވެސް ކަމެއް ސަރުކާރުން ނުކުރާނެ ކަމުގެ ޔަޤީންކަން ވެސް ބަންޑާރަނައިބު ދެއްވިއެވެ.