ވައިއާރްއެފްގެ ތާރީޚުގައި ފުރަތަމަ ފަހަރަށް ބިރުވެރި ފިލްމެއް އުފައްދަނީ

ބޮލީވުޑްގެ އެންމެ ދުވަސްވީ އެއް ޕްރޮޑަކްޝަން ހައުސް ކަމަށްވާ ޔާޝް ރާޖް ފިލްމްސް އިން ބިރުވެރި ޖޯންރާއަށް ވަދެ އެ ކުންފުނީގެ ފުރަތަމަ ހޮރޯ ފިލްމުގެ މައިގަނޑު ތަރިއެއްގެ ގޮތުގައި ވަރުން ދަވަން އިއްޔެ އިއުލާންކޮށްފި އެވެ.

ބައި ގަރުނަށް ވުރެ ދިގު މާޒީއެއް އޮތް ވައިއާރްއެފް މީގެ ކުރިން ބެލުންތެރިންނާ ހަމައަށް ގެނެސްދީފައި ވަނީ އެކްޝަނާއި ލޯބީގެ ފިލްމުތަކާއި ޑްރާމާ ފިލްމުތައް ކަމަށް ވާއިރު ތަފާތު ޖޯންރާތަކަށް ފުޅާވުމުގެ މި ފިޔަވަޅު ނެގީ ކުންފުނީގެ ސީއީއޯ އަކްޝޭ ވިދާނީގެ އިސްނެންގެވުމާ އެކުގައި ކަމަށް ރިޕޯޓްތައް ބުނެ އެވެ.

މި ފިލްމު ޑައިރެކްޓްކޮށް ސްކްރީންޕްލޭ ލިޔާނީ ވެބް ސީރީޒް "ރޮކެޓް ބޯއިސް" އިން ގިނަ ބައެއްގެ ތައުރީފު ލިބުނު އަބޭ ޕައްނޫ އެވެ. ފީޗާ ފިލްމެއް ޑައިރެކްޓް ކުރުމުގެ ފުރުސަތު އަބޭއަށް ލިބޭ ފުރަތަމަ ފަހަރު ވެސް މެ އެވެ. ވަރުންނާއި ވައިއާރްއެފް އެކުގައި މަސައްކަތް ކުރި އެންމެ ފަހު ފިލްމަކީ 2018 ގައި ނުކުތް "ސުއީ ދާގާ: މޭޑް އިން އިންޑިއާ" އެވެ.

ފިލްމު އުފައްދާ ފަރާތުން ފާހަގަކުރާ ގޮތުގައި މިއީ ބޮލީވުޑްގައި ފަހަކަށް އައިސް ގިނަވެފައިވާ ހޯރާ-ކޮމެޑީ ފިލްމުތަކާ މުޅިން ތަފާތު ބެލުންތެރިންގެ ގައިން ހީބިހި ނަގާ ވަރުގެ ނާމާން މާހައުލެއް ދައްކުވައިދޭނެ ހަގީގީ ބިރުވެރި ފިލްމެކެވެ.

ފިލްމުގެ ޝޫޓިން މި އަހަރު ފަހުކޮޅު ފެށުމަށް ރާވާފައި ވާއިރު ސިނަމާތަކުގައި ފިލްމު އެޅުވުމަށް ތާވަލުކޮށްފައި ވަނީ އަންނަ އަހަރު އެވެ.