ވިޔަފާރި ބަނދަރު ތިލަފުއްޓަށް ބަދަލުކުރުމަކީ މިވަގުތުގެ އެންމެ މުހިންމު މަޝްރޫޢު ކަމަށް ރައީސް ވިދާޅުވެއްޖެ

ރާއްޖޭގެ އިޤްތިޞާދީ ކުރިއެރުމަށް މިހާރު ހިންގާ އެންމެ މުހިންމު މަޝްރޫޢަކީ މާލޭ ވިޔަފާރި ބަނދަރު ތިލަފުއްޓަށް ބަދަލުކުރުން ކަމަށް ވިދާޅުވެ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ތިލަފުށީގެ މަސައްކަތް ބައްލަވައިލައްވައިފިއެވެ.

އެމަނިކުފާނު ތިލަފުއްޓަށް ވަޑައިގެން ނޫސްވެރިންނާ ވާހަކަފުޅު ދެއްކެވި އިރު، މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯ ކެޕްޓަން ޙުސައިން ޝަފީޤު ވަނީ އެމަނިކުފާނަށް މަރުޙަބާ ދަންނަވައިފައެވެ. އެމްޕީއެލްގެ ފަރާތުން ވަނީ މަޝްރޫޢުގެ އެންމެ ފަހުގެ މަޢުލޫމާތު ރައީސާ ހިއްސާކޮށްފައެވެ.

ރައީސް ވިދާޅުވީ ސަރުކާރުގެ އެކި އިދާރާތަކާއި ބައިނަލްއަޤުވާމީ ފަރާތްތައް ގުޅިގެން މި މަސައްކަތް ވަރަށް ކާމިޔާބުކަމާ އެކު ކުރިއަށްދާ ކަމަށެވެ. އެމަނިކުފާނު ވަނީ ރެޔާއި ދުވާލު ބުރަކޮށް މަސައްކަތްކުރާ ވުޒާރާތަކާއި ކުންފުނިތަކުގެ ވެރިންނާއި މުވައްޒަފުންނަށް ޝުކުރު އަދާކުރައްވައިފައެވެ.

މި މަޝްރޫޢުގެ ދަށުން ތިލަފުށީގައި 60 ހެކްޓަރުގެ ބަނދަރެއް ބިނާކުރެވޭނެއެވެ. މިހާރު އެތެރޭގެ އުޅަނދުފަހަރަށް ޚާއްޞަ ކީ ވޯލްގެ ފުރަތަމަ 100 މީޓަރު ނިމިފައިވާ އިރު، ހިއްކި ސަރަހައްދުގެ ބެކްފިލް މަސައްކަތުގެ ގާތްގަނޑަކަށް 40 އިންސައްތަ ވަނީ ފުރިހަމަވެފައެވެ. ބިންގަނޑު އެއްވަރުކޮށް މަގުތައް ހެދުމާއި، ޕްރީކާސްޓް ކޮންކްރީޓް ބްލޮކް ސައިޓުގައި އުފެއްދުމާއި، ބޭނުންވާ ވަސީލަތްތައް ހޯދުމާއި، ޓާމިނަލް ޢިމާރާތްތަކުގެ ކޮންޓްރެކްޓަރަކު ހޮވުމުގެ މަސައްކަތް ވެސް ކުރިއަށްދެއެވެ.

ބަނދަރު ހުޅުވާ އިރު 14.6 މީޓަރު ފުންމިނުގެ 375 މީޓަރު ދިގު ބައިނަލްއަޤުވާމީ ކީ ވޯލެއް ހެދިފައި ހުންނާނެ ކަމަށާއި، ފަހުން އެ ކީ ވޯލް 1.4 ކިލޯމީޓަރަށް ދިގުކުރެވޭނެ ޖާގަ އޮންނާނެ ކަމަށް ސަރުކާރުން ބުނެފައިވެއެވެ. އެތެރޭގެ އުޅަނދުތަކަށް ދެ ކިލޯމީޓަރަށް ވުރެ ދިގު ކީ ވޯލެއް ވެސް ޤާއިމުކުރެވޭނެއެވެ. ފެށޭ އިރު އަހަރަކު 390،000 ޓީއީޔޫގެ ކޮންޓެއިނަރު ކެޕޭސިޓީ ހުންނާނެ އިރު، މުޅި މަޝްރޫޢު ނިމޭ އިރު އެ ޢަދަދު 1.8 މިލިއަން ޓީއީޔޫ އަށް އިތުރުކުރެވޭނެ ކަމަށެވެ. ޝިޕް ޓު ޝޯ ދެ ކީ ކެރޭނާއި އެއް މޮބައިލް ހާބަރ ކެރޭނު ވެސް ބެހެއްޓޭނެއެވެ.

މާލޭ ވިޔަފާރި ބަނދަރުގައި މިހާރު ބޯޓަކުން މުދާ ބާލައި ބަރުކުރުމަށް ހަތް ދުވަހާއި 14 ދުވަހާ ދެމެދުގެ މުއްދަތެއް ނަގާ އިރު، ތިލަފުށީގެ އައު ބަނދަރާ އެކު އެ މުއްދަތު ގާތްގަނޑަކަށް ދެ ދުވަހަށް ކުރުކުރެވޭނެ ކަމަށް އަންދާޒާކުރެވެއެވެ. އަންނަ އަހަރުގެ ނޮވެމްބަރު މަހު މި ބަނދަރު އޮޕަރޭޝަނަށް ގެނެވޭނެ ކަމުގެ ޔަޤީންކަން ރައީސް ކުރިން ވެސް ވަނީ ދެއްވައިފައެވެ.