ޕެންޝަން އޮފީހުގެ ތްރީ ޖެނެރޭޝަން ވޯކް ހަނިމާދޫގައި ބާއްވަން ނިންމައިފި

ތިން ޖީލުގެ ޢާއިލީ މެންބަރުން ބައިވެރިކޮށްގެން ޕެންޝަން އޮފީހުން ކޮންމެ އަހަރަކު ބާއްވާ ތްރީ ޖެނެރޭޝަން ވޯކްގެ ހަތަރުވަނަ ބުރު 17 އޮކްޓޫބަރު 2026 ގައި ހދ. ހަނިމާދޫގައި ބޭއްވުމަށް ހަމަޖައްސައިފިއެވެ.

މި ހަރަކާތަކީ ކުޑަކުދިންނާއި ބޮޑެތި މީހުންނާއި ދޮށީ ޢުމުރުގެ މީހުން ހިމެނޭ ގޮތަށް ރާވާފައިވާ އެއް ކިލޯމީޓަރުގެ ރަމްޒީ ހިނގާލުމެކެވެ. ފަހަށް ފައިސާ ރައްކާކުރުމާއި އިންވެސްޓް ކުރުމާއި ރިޓަޔަމަންޓަށް ތައްޔާރުވުމުގެ މުހިންމުކަން ބައިވެރިންނަށް ހަނދާންކޮށްދިނުމަކީ މި ހިނގާލުމުގެ މައިގަނޑު އެއް ބޭނުމެވެ. މާލީ ރައްކާތެރިކަމަކީ ވަކި ޢުމުރެއްގެ ބައެއްގެ އެކަނި ޒިންމާއެއް ނޫން ކަމާއި، ޅަ ދުވަހުން ފެށިގެން ދޮށީ ޢުމުރާ ހަމައަށް ދެމިގެންދާ ދަތުރެއް ކަން މި ހިނގާލުން ރަމްޒުކޮށްދޭ ކަމަށް ޕެންޝަން އޮފީހުން ބުނެފައިވެއެވެ.

ހިނގާލުމަށް ފަހު ހުރިހާ ޢުމުރެއްގެ ބައިވެރިންނަށް ހުޅުވައިލައިގެން ޢާއިލީ ހަވީރެއް ވެސް ކުރިއަށް ގެންދިޔުމަށް ވަނީ ރާވައިފައެވެ. އެ ހަވީރުގައި ތަފާތު ކުޅިވަރުތަކާއި، ދިވެހި ސަގާފަތާއި އާދަކާދަ ދައްކުވައިދޭ ހަރަކާތްތަކާއި، މަޢުލޫމާތު ފޯރުކޮށްދޭ ސްޓޯލްތަކާއި ފުޑް ކޯޓެއް ހިމެނޭ ކަމަށް އެ އޮފީހުން ބުނެފައިވެއެވެ.

ތިން ޖީލުގެ ޢާއިލީ ގުޅުން ބަދަހިކޮށް، އުފާވެރި މާޙައުލެއްގައި އެކުގައި ވަގުތު ހޭދަކުރުމުގެ ފުރުޞަތު ޢާއިލާތަކަށް ފަހިކޮށްދިނުމަކީ ވެސް މި ހަރަކާތުގެ މުހިންމު މަޤުޞަދެއް ކަމަށް ޕެންޝަން އޮފީހުން ބުނެފައިވެއެވެ. ރަނގަޅު މާލީ އާދަތައް ޢާއިލާ ތެރެއިން އަށަގެންނެވުމަށް އެ އޮފީހުން ހިންގާ މެދުކެނޑުމެއް ނެތް މަސައްކަތްތަކުގެ ތެރެއިން މި ހިނގާލުން ކޮންމެ އަހަރަކު ވެސް ބާއްވަމުން ގެންދެއެވެ.