ތިލަފުށީ ބަނދަރުގެ މަސައްކަތް ކުރިއަށްދާ ގޮތް ރައީސް ބައްލަވާލައްވައިފި

މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫޢު ކުރިއަށްދާ ގޮތް ބައްލަވާލެއްވުމަށް ރައީސް ޑރ. މުޙައްމަދު މުޢިއްޒު މިއަދު ތިލަފުއްޓަށް ވަޑައިގެން، އެ މަޝްރޫޢާ އެކު ރާއްޖެއަށް އިޤްތިޞާދީ ބޮޑު ބަދަލެއް އަންނާނެ ކަމަށް ވިދާޅުވެއްޖެއެވެ.

އެ ދަތުރުފުޅުގައި މިހާތަނަށް ނިމިފައިވާ މަސައްކަތްތަކާއި މަޝްރޫޢުގެ އެކި މަރުޙަލާތައް ބެހިފައިވާ ގޮތާއި ކުރިއަށް ރޭވިފައި ހުރި ކަންކަމުގެ އެންމެ ފަހުގެ މަޢުލޫމާތު ރައީސް އޮޅުންފިލުއްވައިފައިވެއެވެ. މީޑިއާތަކާ ވާހަކަފުޅު ދައްކަވަމުން ރައީސް ވިދާޅުވީ، މި ވަގުތު ސަރުކާރުން އެންމެ ބޮޑު އިސްކަމެއް ދެއްވާ އެއް މަޝްރޫޢަކީ މި ބަނދަރު ތަރައްޤީކުރުން ކަމަށެވެ. މިހާރު ބޭނުންކުރަމުންދާ ބަނދަރަކީ ރާއްޖޭގެ އިޤްތިޞާދު ކުރިއަރަމުން އަންނަ ދުވެއްޔަށް ބަލާއިރު އެކަށީގެންވާ ވަސީލަތެއް ނޫން ކަމަށް ވެސް ރައީސް ފާހަގަކުރެއްވިއެވެ.

ރައީސް ވިދާޅުވީ "މިއީ ރާއްޖޭގެ އުފެންދުންތެރިކަން މައްޗަށް ގެންދިއުމަށް ވިޔަފާރިތައް މައްޗަށް ގެންދިއުމަށް އެންމެ މުހިންމު މަޝްރޫޢު. ކަމާގުޅޭ ވުޒާރާތަކާއި ކުންފުނިތައް އަދި ބޭރުގެ ފަރާތްތައް ގުޅިގެން މިހާތަނަށް މަސައްކަތް ގެންގޮސްފަވާ ހިސާބާމެދު ވަރަށް ހިތްހަމަޖެހޭ" ކަމަށެވެ.

އާ ބަނދަރު ބޭނުންކުރަން ފެށުމާ އެކު ޕޯޓުގެ ޚިދުމަތްތައް ހަތަރު ގުނައަށް ފުޅާވެގެންދާނެ ކަމަށް ރައީސް ވިދާޅުވިއެވެ. މި ވަގުތު ކުރިއަށް ދަނީ ޑޮމެސްޓިކް މަގަތު ފާލަމުގެ މަސައްކަތް ކަމަށާއި، މި މަހުގެ ފަހުކޮޅު އެ ފާލަމުން ޚިދުމަތް ދޭން ފެށޭނެ ކަމަށް ވެސް ވިދާޅުވިއެވެ. ސަރުކާރުގެ އަމާޒަކީ އަންނަ އަހަރުގެ ނޮވެމްބަރު 11 ގެ ނިޔަލަށް ޕޯޓުގެ ހުރިހާ ޚިދުމަތެއް ތިލަފުއްޓަށް ބަދަލުކޮށް ނިންމައިލުމެވެ.

ރައީސްގެ މި ޒިޔާރަތުގައި އިޤްތިޞާދީ ތަރައްޤީއާ ބެހޭ ވަޒީރު މުޙައްމަދު ސަޢީދާއި ބައެއް ވަޒީރުންނާއި މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯ ހުސައިން ޝަފީޤް އަދި ބައިނަލްއަޤުވާމީ ކީވޯލްގެ މަސައްކަތް ހަވާލުކޮށްފައިވާ ޗައިނާގެ ކުންފުނީގެ ބޭފުޅުން ވެސް ބައިވެރިވެވަޑައިގެންނެވިއެވެ.