ޖަޕާނުގެ ރަސްމީ ސެކިއުރިޓީ އެހީ ރާއްޖެއަށް ދިނުމާ ގުޅޭ ގޮތުން މަޝްވަރާކުރައްވައިފި

ޖަޕާނުން ރާއްޖެއަށް ފުރަތަމަ ފަހަރަށް ރަސްމީ ސެކިއުރިޓީ އެހީތެރިކަން ފޯރުކޮށްދިނުމާ މެދު ވިސްނަމުންދާ ކަމަށް ޚާރިޖީ ވަޒީރު އިރުތިޝާމް އާދަމް މިއަދު ވިދާޅުވެއްޖެއެވެ.

ޖަޕާނުގެ އެމްބަސީ ރާއްޖޭގައި ހުޅުވިތާ 10 އަހަރު ފުރުން ފާހަގަކުރުމަށް ހޮޓެލް ޖެންގައި ބޭއްވި ޚާއްޞަ ޙަފުލާގައި ވާހަކަދައްކަވަމުން ވަޒީރު ވިދާޅުވީ ދެ ޤައުމަކީ ވެސް ބޮޑު ކަނޑުގެ ސަރަޙައްދެއް ހިއްސާކުރާ ދެ ޤައުމު ކަމަށާއި، އިންޑޯ-ޕެސިފިކް ސަރަޙައްދުގެ ސުލްޙައާއި މިނިވަންކަން ދެމެހެއްޓުމަށް ދެ ފަރާތުން ވެސް އިސްކަންދޭ ކަމަށެވެ. ސެކިއުރިޓީ ދާއިރާއިން ޖަޕާނުގެ އެހީ ލިބެން ފެށުމަކީ ދެ ޤައުމުގެ ގުޅުން ދެމެހެއްޓެނިވި ގޮތެއްގައި ވަރުގަދަކުރުމަށް ލިބޭ ބޮޑު ކުރިއެރުމެއް ކަމަށް ވެސް އެ ކަމަނާ ފާހަގަކުރެއްވިއެވެ.

އެ ޙަފުލާގައި ވަޒީރު ވަނީ ފާއިތުވި އަހަރުތަކުގައި ޖަޕާނުން ރާއްޖެއަށް ފޯރުކޮށްދީފައިވާ އެކި އެހީތައް ޝުކުރުވެރިކަމާ އެކު ފާހަގަކުރައްވައިފައެވެ. އެ ގޮތުން ބޮޑުތަކުރުފާނު މަގުގެ ތޮށިގަނޑު ހެދުމާއި، ސްކޫލްތައް ބިނާކުރުމާއި، ކާރިސާތަކުން އަރައިގަތުމަށް ދީފައިވާ އެހީ ވަޒީރު ފާހަގަކުރެއްވިއެވެ. ހަމައެއާ އެކު ފާއިތުވި 10 އަހަރު ދެ ޤައުމުގެ ރައްޔިތުން ގުޅުވައިދީ ރާއްޖޭގެ އިޤުތިޞާދީ އަދި އިޖުތިމާޢީ ތަރައްޤީއަށް މަސައްކަތްކޮށްދެއްވި ކަމަށްޓަކައި ސަފީރު އިޝިގާމީ ރުމީކޯއާއި އެމްބަސީގެ ޓީމަށް ވެސް ވަޒީރު ތައުރީފުކުރެއްވިއެވެ.

މީގެ އިތުރުން ވަޒީރު ވިދާޅުވީ އދ. ގެ ޢާންމު މަޖިލީހުގެ ހަވާސާގައި ޖަޕާނުގެ ޚާރިޖީ ވަޒީރާ ބައްދަލުކުރައްވައި ކުރިއަށް އޮތް ތަނުގައި ގުޅުން އިތުރަށް ހަރުދަނާކުރެވޭނެ ގޮތްތަކާ މެދު މަޝްވަރާކުރެއްވި ކަމަށެވެ.

އަންނަ އަހަރަކީ ރާއްޖެއާއި ޖަޕާނާ ދެމެދު ސިޔާސީ ގުޅުން ޤާއިމުކުރިތާ 60 އަހަރު ފުރޭ އަހަރު ކަމަށް ވާތީ، އެ މުނާސަބަތާ ގުޅިގެން ދެ ޤައުމުގެ ގުޅުން އައު ހަރުފަތަކަށް ގެންދެވޭނެ ކަމުގެ އުންމީދު އެބައޮތް ކަމަށް ވެސް ވަޒީރު އިރުތިޝާމް ވިދާޅުވިއެވެ.