ގޭންގު ލީޑަރުންގެ މައްސަލަތައް ތަހުގީގުކޮށް ހަރުކަށި ފިޔަވަޅު އަޅާނެ ކަމަށް ވަޒީރު ވިދާޅުވެއްޖެ

ގޭންގުތަކަށް ނިސްބަތްވާ ދިހަ ލީޑަރެއްގެ މައްސަލަ ތަހުގީގުކުރަމުންދާ ކަމަށާއި އެ ފަރާތްތަކާ މެދު ހަރުކަށި ފިޔަވަޅު އެޅޭނެ ކަމަށް ދާހިލީ ވަޒީރު އަލީ އިހްސާން އަހާ ފޯރަމްގައި ވިދާޅުވެއްޖެއެވެ.

ވަޒީރު ވިދާޅުވި ގޮތުގައި 2007 ވަނަ އަހަރުން ފެށިގެން 2023 ވަނަ އަހަރުގެ ނިޔަލަށް ކޮންމެ އަހަރަކު ދޭކާއި ފަހެއްގެ ދެމެދުގެ އަދަދަކަށް ޒުވާނުން ގަތުލުކުރެވެމުން ދިޔައެވެ. އެ ހާލަތު ބަދަލުކުރުމަށް ގޭންގުތަކުގެ ހަރަކާތްތައް އެންމެ ބޮޑު ސަރަހައްދުގައި ފުލުހުން ހަރަކާތްތެރިވާ މިންވަރު އިތުރުކޮށްފައިވާ ކަމަށް ވިދާޅުވިއެވެ. އަދި ގޭންގުތަކަށް ކުރީން އުޅެމުން ދިޔަ ގޮތަށް ދެން ނޫޅެވޭނެ ކަމަށް ވެސް ވިދާޅުވިއެވެ.

ފާއިތުވި ތިން އަހަރުގެ ތެރޭގައި 52 ޓާގެޓެޑް އޮޕަރޭޝަން ހިންގައި 10،400 އަށް ވުރެ ގިނަ މީހުން ޗެކްކޮށްފައިވާ ކަމަށް ވަޒީރު ވިދާޅުވިއެވެ. އެ އޮޕަރޭޝަންތަކުގައި 517 މީހުން ހައްޔަރުކޮށް، ގޭންގުތަކާ ގުޅޭ 670 ސައިކަލު ޓޯކޮށްފައިވާ ކަމަށް ވެސް ވިދާޅުވިއެވެ. މި މަސައްކަތުގެ ނަތީޖާއެއްގެ ގޮތުން ފާއިތުވި ތިން އަހަރު ގޭންގު މާރާމާރީއެއްގައި އެއްވެސް މީހަކު މަރުވެފައި ނުވާ ކަމަށް ވިދާޅުވިއެވެ. ގޭންގުތަކުގައި ހިމެނުނު ފަރާތްތަކުގެ ތެރެއިން އިސްލާހުވާން އެދުނު މީހުންނަށް ފުރުސަތު ދެވުނު ކަމަށާއި ގިނަ ބަޔަކު ރަނގަޅު މަގު ހިޔާރުކުރި ކަމަށް ވެސް ވަޒީރު ފާހަގަކުރެއްވިއެވެ.

"ދިހަ ގޭންގު ލީޑަރެއްގެ މައްސަލަ މިދިޔަ ޖޫން މަހުން ފެށިގެން އަޅުގަނޑުމެން އެބަ ގެންދަން ތަހުގީގު ކުރަމުން،" ވަޒީރު ވިދާޅުވިއެވެ.

އެ ފަރާތްތަކާ މެދު އައު ޤާނޫނުގެ ދަށުން ފިޔަވަޅު އެޅޭނެ ކަމަށާއި މި މައްސަލައަށް ދާއިމީ ހައްލެއް އަންނާނެ ކަމަށް ވެސް ވަޒީރު ވިދާޅުވިއެވެ.