ޣައިރު ޤާނޫނީ ގޮތުން އުފެއްދި ސިނގިރެޓާއި ދުންފަތް ދޫނިދޫގައި ނައްތާލައިފި

ހެންވޭރު ގެއެއްގައި ޤާނޫނާ ޚިލާފަށް ސިނގިރެޓް އުފެއްދި މައްސަލައިގައި ފުލުހުން ހޯދި ގިނަ އަދަދެއްގެ ސިނގިރެޓާއި ދުންފަތް ސެޕްޓެމްބަރު 28 ވަނަ ދުވަހު ދޫނިދޫގައި ނައްތާލައިފިއެވެ.

ނައްތާލި ތަކެތީގެ ތެރޭގައި 4،285 ސިނގިރެޓް ކާޓޫނާއި 232 ފޮށި ސިނގިރެޓާއި 93.60 ކިލޯގެ ދުންފަތް ހިމެނެއެވެ.

މި ތަކެއްޗަކީ ހެންވޭރު ގެއެއްގެ އެޕާޓްމަންޓެއްގައި ހިންގަމުން ދިޔަ އޮފީހެއްގައި މެޝިން ބަހައްޓައިގެން ސިނގިރެޓް އުފައްދާ ކަމަށް ތުހުމަތުކުރެވޭ މައްސަލައާ ގުޅިގެން 30 ޖެނުއަރީ 2025 ގައި ފުލުހުން ހިންގި އޮޕަރޭޝަނެއްގައި އަތުލައިގެންފައިވާ ތަކެއްޗެވެ.

ފުލުހުންގެ ބެލުމުގެ ދަށަށް ގެނެވޭ މިފަދަ ތަކެތި ނައްތާލުމުގައި ޢަމަލުކުރާ އުސޫލުގެ ދަށުން، އެކަމަށްޓަކައި އެކުލަވައިލި ކޮމިޓީގެ ބެލުމުގެ ދަށުން މި ތަކެތި ނައްތާލާފައިވެއެވެ.