މާޒިޔާގެ ސުޒެއިރު 10 މެޗަށް ސަސްޕެންޑްކޮށް 15،000 ރުފިޔާއިން ޖޫރިމަނާކޮށްފި

ދިރާގު ދިވެހި ޕްރިމިއަރ ލީގުގައި ނިއު ރޭޑިއަންޓުގެ އެސިސްޓަންޓް ކޯޗަށް ހަމަލާދިން މައްސަލައިގައި މާޒިޔާ ސްޕޯޓްސް އެންޑް ރެކްރިއޭޝަންގެ އެސިސްޓަންޓް ކޯޗު އަހުމަދު ސުޒެއިރަށް 10 މެޗުގެ ސަސްޕެންޝަނަކާއި 15،000 ރުފިޔާގެ ޖޫރިމަނާއެއް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ކަނޑައަޅައިފިއެވެ.

މި މަހުގެ 17 ވަނަ ދުވަހުގެ ރޭ ޤައުމީ ފުޓްބޯޅަ ދަނޑުގައި ނިއު ރޭޑިއަންޓާއި މާޒިޔާ ވާދަކުރި ލީގު މެޗުގެ 77 ވަނަ މިނެޓުގައި ދެ ޓީމުގެ ބެންޗު ކައިރީގައި ހަމަނުޖެހުމެއް ހިނގައި، އެ ހަމަނުޖެހުމުގެ ތެރެއިން ސުޒެއިރު ވަނީ ނިއުގެ އެސިސްޓަންޓް ކޯޗު ލޫސިއާނޯ ސީކުއެއިރާ ބާބޯސާގެ މޫނުމަތީގައި ޖަހައި ބޮޑެތި އަނިޔާތަކެއް ދީފައެވެ. އެ ހަމަލާގެ ސަބަބުން ލޫސިއާނޯގެ އަނގަމަތި ވަރަށް ބޮޑަށް ފަޅައިގެން ގޮސްފައިވެއެވެ. އެ މެޗުން 3-2 އިން މޮޅުވީ ނިއު ރޭޑިއަންޓެވެ.

މި ހާދިސާގެ ވީޑިއޯތައް ސޯޝަލް މީޑިއާގައި ފެތުރި ގިނަ ބައެއްގެ ފާޑުކިޔުން އަމާޒުވެފައިވެއެވެ. މެޗުގެ ރެފްރީ ވަނީ ސުޒެއިރަށް ވަގުތުން ރަތް ކާޑު ދައްކައި ދަނޑުން ފޮނުވާލައިފައެވެ.

އެފްއޭއެމުން ނެރުނު ބަޔާނުގައިވާ ގޮތުން، އެ އެސޯސިއޭޝަނުގެ ޑިސިޕްލިނަރީ އެންޑް އެތިކްސް ކޯޑުގެ 34 ވަނަ މާއްދާގެ ދަށުން ސުޒެއިރަށް ފިޔަވަޅު އެޅީއެވެ. ޖޫރިމަނާ ފައިސާ ކުރިއަށް އޮތް 15 ދުވަހުގެ ތެރޭގައި އެފްއޭއެމަށް ދައްކައި ޚަލާޞްކުރުމަށް ވަނީ އަންގައިފައެވެ. މީގެ އިތުރުން ޑިސިޕްލިނަރީ ކޮމިޓީގެ ނިންމުން އިސްތިއުނާފު ކުރަން ބޭނުންވާ ނަމަ ތިން ދުވަހުގެ ތެރޭގައި ލިޔުމުން އެކަން އެންގުމަށް ވެސް ވަނީ އަންގައިފައެވެ.