ނަޝީދުގެ ޑިމޮކްރަސީއަކީ ހުސް އަޑެއް ކަމަށް ޔާމީން ސިފަކުރައްވައިފި

ކުރީގެ ރައީސް މުޙައްމަދު ނަޝީދު ވިދާޅުވާ ޑިމޮކްރަސީއަކީ "ހުސް އަޑު" ކަމަށާއި ކުރީގެ ރައީސް އިބްރާހީމް މުޙައްމަދު ޞާލިޙުގެ ވާހަކަ ދައްކަވާ ހިތްޕުޅު ނުވާ ކަމަށް ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ރޭ ވިދާޅުވެއްޖެއެވެ.

ޕީޕަލްސް ނެޝަނަލް ފްރަންޓް (ޕީއެންއެފް) އިން އައްޑޫ ސިޓީ ފޭދޫގައި ރޭ ބޭއްވި ޖަލްސާގައި ވާހަކަފުޅު ދައްކަވަމުން ޔާމީން ވިދާޅުވީ ނަޝީދުގެ ވެރިކަމުގައި ޑިމޮކްރަސީގެ ނަމުގައި އާބިޓްރަރީކޮށް މީހުން ހައްޔަރުކޮށްފައިވާ ކަމަށެވެ. ނަޝީދު އެކި ވާހަކަފުޅުތައް ދެއްކެވި ނަމަވެސް އެ ވާހަކަފުޅުތައް ޙަޤީޤަތަކަށް ވެފައި ނުވާ ކަމަށް ޔާމީން ވިދާޅުވިއެވެ.

"ޑިމޮކްރަސީ އަކީ ހަމަ ނޮއިސް އެމްޓީ ނޮއިސް އިނގޭތޯ. ރައީސް ސޯލިހްގެ ވާހަކަ ދައްކާ ހިތެއްވެސް ނުވޭ،" ޔާމީން ވިދާޅުވިއެވެ.

ކުރީގެ ވެރިކަންތަކާ އަޅައިކިޔުއްވައި ޔާމީން ވިދާޅުވީ ކުރީގެ ރައީސް މައުމޫން ޢަބްދުލްޤައްޔޫމާއި ކުރީގެ ރައީސް މުޙައްމަދު ވަޙީދު ޙަސަން މަނިކު ނުފުއްދެވޭ ވަރުގެ ވަޢުދުތައް ނުވެ ރައްޔިތުންގެ އިތުބާރު ހޯއްދެވި ކަމަށެވެ. ރައީސް ޞާލިޙުގެ ވެރިކަމުގައި ކޮވިޑް-19 ގެ ޙާލަތަށް ފަހު ތަރައްޤީއަށް ލިބިވަޑައިގެންނެވި ދެ އަހަރާ ބައިގެ ތެރޭގައި ރައްޔިތުންގެ ދިރިއުޅުމަށް ފާހަގަކޮށްލެވޭ ބަދަލެއް ގެނެސްދެވިފައި ނުވާ ކަމަށް ވެސް ވިދާޅުވިއެވެ. ޔާމީން ވިދާޅުވީ އެ މަނިކުފާނުގެ ވެރިކަމުގައި ވެވަޑައިގެންނެވި ވަޢުދުތައް ފުއްދެވި ކަމަށާއި ނުކުރެއްވޭ ވަރުގެ ކަންކަމުގެ ވާހަކަ ރައްޔިތުންގެ ގާތުގައި ނުދައްކަވާ ކަމަށެވެ.

މިހާރުގެ ސިޔާސީ މަސްރަޙަށް އިޝާރާތްކުރައްވައި ޔާމީން ވިދާޅުވީ ސިޔާސީ ލީޑަރުން ދެކެ ރައްޔިތުން ފޫހިވެފައިވާ ކަމަށެވެ. ރައީސް ޑރ. މުޙައްމަދު މުޢިއްޒާ އެކު ތިއްބެވި ލީޑަރުން މަސައްކަތް ކުރައްވަނީ އަމިއްލަ މަންފާއަށް ކަމަށާއި އެ ވެރިކަމުގައި ރައްޔިތުންނަށް ފައިދާ ކުރާ ކަންކަން ނުވާ ކަމަށް ރައްޔިތުން ޤަބޫލުކުރާ ކަމަށް ތުހުމަތުކުރެއްވިއެވެ. އެންމެ ބޮޑު އިދިކޮޅު ޕާޓީ އެމްޑީޕީން ކުރިން ކުރި ފަދަ މުޒާހަރާތައް މިހާރު ނުފެންނަ ކަމަށާއި ކޮރަޕްޝަންގެ މައްސަލަތައް އެންޓި ކޮރަޕްޝަން ކޮމިޝަން (އޭސީސީ) އަށް ހުށަހެޅުން ފަދަ ކަންކަން ވެސް ނުކުރާ ކަމަށް ވިދާޅުވެ، އެމްޑީޕީގެ ލީޑަރުން ރައްޔިތުންގެ ފަޅިއަށް ނުކުމެވަޑައިގެން ސަރުކާރު ޖަވާބުދާރީ ކުރެއްވުމަށް ޔާމީން ގޮވައިލެއްވިއެވެ.