ރަސްމާލެ މެރީނާ މަޝްރޫޢު ކުރިއަށް ގެންދާނީ ރިއަލް އެސްޓޭޓް ޤާނޫނެއްގެ ދަށުން

ރަސްމާލެ މަޝްރޫޢު ހިންގުމަށް އެކުލަވައިލަމުން އަންނަ ރިއަލް އެސްޓޭޓް ޤާނޫނެއްގެ ދަށުން އެ މަސައްކަތް ކުރިއަށް ގެންދާނެ ކަމަށް ސަރުކާރުން ބުނެފިއެވެ.

ސަރުކާރުން ހާމަކޮށްފައިވާ ގޮތުގައި މިހާތަނަށް ސޮއިކޮށްފައި އޮތީ ކޮމާޝަލް ޓާމްސް ކަނޑައަޅާ ލެޓާ އޮފް އިންޓެންޓެއްގައި އެކަންޏެވެ. ޢަމަލީ މަސައްކަތް ފެށުމުގެ ކުރިން އެ ޝަރުތުތަކުގެ މައްޗަށް ބިނާކޮށް އިތުރު މަޝްވަރާތައް ކުރެވި، ޑެފިނިޓިވް އެގްރީމެންޓްތަކެއްގައި ސޮއިކުރަން ޖެހޭ ކަމަށް ސަރުކާރުން ފާހަގަކޮށްފައިވެއެވެ. އަދި މި މަޝްރޫޢާ ގުޅުން ހުރި ޤާނޫނުތައް ރައްޔިތުންގެ މަޖިލީހުން ފާސްކުރަން ޖެހޭނެ ކަމަށް ވެސް ސަރުކާރުން ބުނެފައިވެއެވެ. ޤާނޫނުއަސާސީއާއި ޤާނޫނުތަކާ ޚިލާފު އެއްވެސް ކަމެއް ރަސްމާލެ މަޝްރޫޢުގައި ނުހިމެނޭނެ ކަމުގެ ޔަޤީންކަން ވެސް ސަރުކާރުން ދީފައިވެއެވެ.

މީގެ އިތުރުން ޓޫރިސްޓް ރިޒޯޓުތައް ކުއްޔަށް ދޫކުރެވޭ މުއްދަތު 99 އަހަރަށް އިތުރުކޮށްފައިވަނީ 2015 ވަނަ އަހަރު ރައީސް ޔާމީންގެ ސަރުކާރުގައި ކަމަށް ސަރުކާރުން ހާމަކޮށްފައިވެއެވެ. ޓޫރިޒަމާ ބެހޭ ޤާނޫނުގެ އަށް ވަނަ މާއްދާ ބުނާ ގޮތުން 99 އަހަރުގެ ކުލީގެ މުއްދަތު ހަމަވުމުން، އެ ރަށެއްގައި ކޮށްފައިވާ އިންވެސްޓްމެންޓުގެ ޖުމްލަ އަގުން ދައުލަތަށް ދައްކަން ޖެހޭ ބައި ކެނޑުމަށް ފަހު ބާކީ އޮންނަ ޢަދަދު އިންވެސްޓަރަށް ސަރުކާރުން ދެއްކުން ލާޒިމުކުރެއެވެ.

ފަތުރުވެރިކަމާ ގުޅޭ ޤާނޫނީ އޮނިގަނޑު ފުރަތަމަ އެކުލަވައިލެވުނީ 1999 ވަނަ އަހަރުއެވެ. އެ ޤާނޫނުގެ ދަށުން ރިޒޯޓުތައް ދޫކުރެވެނީ ގިނަވެގެން 25 އަހަރުގެ މުއްދަތަކަށެވެ. ރައީސް ނަޝީދުގެ ވެރިކަމުގައި 2010 ވަނަ އަހަރު ގެނައި އިޞްލާޙަކުން އެ މުއްދަތު 50 އަހަރަށް ދިގުކުރެވުނެވެ. އޭގެ ފަސް އަހަރު ފަހުން ރައީސް ޔާމީންގެ ދައުރުގައި އެ މުއްދަތު 99 އަހަރަށް ބަދަލުކޮށްފައިވެއެވެ.