ދައުލަތުގެ އާމްދަނީ 5.1 އިންސައްތަ އިތުރުވެ 30 ބިލިއަނަށް އަރައިފި

މިދިޔަ އަހަރުގެ އެ މުއްދަތާ އަޅާބަލާއިރު މިއަހަރުގެ މިހާތަނަށް ދައުލަތަށް ލިބުނު ޖުމްލަ އާމްދަނީ 5.1 އިންސައްތަ އިތުރުވެ 30.205 ބިލިއަން ރުފިޔާއަށް އަރާފައިވާ ކަމަށް މާލީ ވުޒާރާއިން ބުނެފިއެވެ.

އެ ވުޒާރާއިން އެންމެ ފަހުން ޝާއިޢުކުރި ހަފުތާ މާލީ ރިޕޯޓުން ދައްކާ ގޮތުގައި، 2023 ވަނަ އަހަރުގެ އެ މުއްދަތުގައި ދައުލަތަށް ލިބިފައިވަނީ 28.750 ބިލިއަން ރުފިޔާއެވެ. އާމްދަނީ އާއި ހިލޭ އެހީ ހިމެނޭ ގޮތުން ޖުމްލަ ޢަދަދު މިއަހަރު 30.205 ބިލިއަން ރުފިޔާއަށް މައްޗަށް ގޮސްފައިވެއެވެ.

ޓެކުހުގެ ގޮތުގައި ލިބުނު އާމްދަނީ 21.366 ބިލިއަން ރުފިޔާއިން 23.388 ބިލިއަން ރުފިޔާއަށް އިތުރުވެ، 9.5 އިންސައްތައިގެ ކުރިއެރުމެއް ވަނީ ހޯދައިފައެވެ. އޭގެ ތެރެއިން އިމްޕޯޓް ޑިއުޓީ 13.1 އިންސައްތަ އިތުރުވެ 2.484 ބިލިއަން ރުފިޔާއަށް އެރި އިރު، ވިޔަފާރި އާއި މުދަލުގެ ޓެކުހުން ލިބުނު އާމްދަނީ 21.4 އިންސައްތަ އިތުރުވެ 5.8 ބިލިއަން ރުފިޔާއަށް ވަނީ އަރައިފައެވެ. ޓީޖީއެސްޓީ 10.8 އިންސައްތަ އިތުރުވެ 4.05 ބިލިއަން ރުފިޔާގައި ހުރި އިރު، އެއާޕޯޓް ޚިދުމަތުގެ ޗާޖާއި ޑިޕާޗާ ޓެކުހުން 8.8 އިންސައްތައިގެ ކުރިއެރުމަކާ އެކު 1.4 ބިލިއަން ރުފިޔާ ލިބިފައިވެއެވެ. މުދަލުން ލިބޭ އާމްދަނީ 25.3 އިންސައްތަ އިތުރުވެ 1.85 ބިލިއަން ރުފިޔާއަށް އެރި އިރު، ހިލޭ އެހީގެ ގޮތުގައި ލިބުނު ޢަދަދު ދެ ގުނައަށް ވުރެ އިތުރުވެ 0.237 ބިލިއަން ރުފިޔާއިން 0.496 ބިލިއަން ރުފިޔާއަށް ވަނީ މައްޗަށް ގޮސްފައެވެ.

މާލީ ވުޒާރާއިން ބުނީ ރާއްޖޭގެ ފަތުރުވެރިކަމުގެ ސީޒަން ކުރިއަށް އޮތުމާ އެކު، ފަތުރުވެރިކަމުގެ ސިނާޢަތާއި އެ ދާއިރާއާ ގުޅުން ހުރި ދާއިރާތަކުން ދައުލަތަށް ލިބޭ އާމްދަނީ ކުރިއަށް އޮތް ތަނުގައި އިތުރުވާނެ ކަމަށް ބެލެވޭ ކަމަށެވެ. މި ކުރިއެރުންތަކުގެ ސަބަބުން ދައުލަތުގެ މާލީ ޙާލަތު ވަރުގަދަވެ، އިޤުތިޞާދީ ކުރިއެރުމަށް ބާރަކަށް ވެގެންދާނެ ކަމަށް ކަމާ ބެހޭ އިދާރާތަކުން ލަފާކޮށްފައިވެއެވެ.