ޕާލް ރެސިޑެންސީ ޕްރޮގްރާމާ ގުޅޭ ގޮތުން ޢަދާލަތުގެ އިސްވެރިން ވަޒީރު ސަޢީދާ ބައްދަލުކުރައްވައިފި

ސަރުކާރުން ތަޢާރަފުކުރުމަށް ނިންމާފައިވާ މޯލްޑިވްސް ޕާލް ރެސިޑެންސީ ވިސާ ޕްރޮގްރާމާ ގުޅޭ މަޢުލޫމާތު އޮޅުންފިލުއްވުމަށް ޢަދާލަތު ޕާޓީގެ އިސް ލީޑަރޝިޕުން އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދާ ބައްދަލުކުރައްވައިފިއެވެ.

އެ ބައްދަލުވުމުގައި ޢަދާލަތު ޕާޓީގެ ފަރާތުން އިސްކޮށް ބައިވެރިވެވަޑައިގެންނެވީ އެ ޕާޓީގެ ރައީސް އައްޝައިޚް މުޙައްމަދު ޝިފާނެވެ. އެ ބައްދަލުވުމުގައި ޕާޓީގެ ލީޑަރޝިޕްގެ އިތުރު ބޭފުޅުން ވެސް ބައިވެރިވެވަޑައިގެންނެވިއެވެ.

ޕާލް ރެސިޑެންސީ ޕްރޮގްރާމަކީ ރާއްޖޭގައި ބޮޑެތި އިންވެސްޓްމެންޓުތައް ކުރާ ބޭރުގެ ފަރާތްތަކަށް ޚާއްޞަކޮށް ސަރުކާރުން ތަޢާރަފުކުރާ ވިސާ ޕްރޮގްރާމެކެވެ. އެ ޕްރޮގްރާމުގެ ބޭނުމަކީ ބޭރުގެ އިންވެސްޓަރުންނަށް ރާއްޖޭގައި އިންވެސްޓްކޮށް ދިގު މުއްދަތަކަށް ދިރިއުޅެވޭނެ މަގު ފަހިކޮށްދިނުމެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މި ޕްރޮގްރާމް ރަސްމީކޮށް އިޢުލާނުކުރެއްވީ ސިންގަޕޫރަށް ކުރެއްވި ރަސްމީ ދަތުރުފުޅުގެ ތެރެއިންނެވެ. އެ ޕްރޮގްރާމް ހިންގުމަށް ހަމަޖެހިފައި ވަނީ މި ދާއިރާގައި ދުނިޔޭގެ ފެންވަރުގައި މަޝްހޫރު ކުންފުންޏެއް ކަމަށްވާ ހެންލީ އެންޑް ޕާޓްނާސްއާ ޙަވާލުކޮށްގެންނެވެ.