ހުޅުމާލެ އަމާން އުދަރެސް ސާފުކޮށް މަދިރި ނައްތާލުމުގެ ޚާއްސަ ހަރަކާތެއް ހިންގައިފި

މަދިރީގެ ނުރައްކަލުން ރައްޔިތުން ސަލާމަތްކުރުމުގެ ގޮތުން ހުޅުމާލޭ ދެވަނަ ފިޔަވަހީގެ އަމާން އުދަރެސް ސަރަހައްދުގައި ގިނަ މުއައްސަސާތަކެއް ގުޅިގެން ސާފުކުރުމުގެ ބޮޑު ހަރަކާތެއް މިއަދު ކުރިއަށް ގެންގޮސްފިއެވެ.

"މަދިރިން ރައްކާ" ނަމުގައި ހިންގި މި ޕްރޮގްރާމްގައި އެޗްޑީސީ އާއި އެފްޑީސީ އާއި ފުލުހުންގެ ޚިދުމަތާއި ވެމްކޯ އަދި މޯޕާ ވަނީ ބައިވެރިވެފައެވެ. އެޗްޑީސީގެ މެނޭޖިންގ ޑިރެކްޓަރު ޢަލީ ޒުހައިރު ވިދާޅުވި ގޮތުގައި ދުޅަހެޔޮ މުޖުތަމަޢެއް ބިނާކުރުމާއި ބަލިމަޑުކަމުން ރައްޔިތުން ރައްކާތެރިކުރުމުގެ މަޤުސަދުގައި ފެށި މި ޕްރޮގްރާމް ސިލްސިލާކޮށް ހުޅުމާލޭގެ އެކި ހިސާބުތަކުގައި ކުރިއަށް ގެންދާނެއެވެ.

ޒުހައިރު ފާހަގަކުރެއްވި ގޮތުގައި ކުނިބުނީގެ ސަބަބުން ރައްޔިތުންނަށް ދަތިވާ ސަރަހައްދުތަކަށް ޚާއްސަ ސަމާލުކަމެއް ދީގެން ކުނި ނެގުމާއި މަދިރި ފެތުރޭ ތަންތަން ނައްތާލުން ހިމެނޭ ގޮތަށް ގިނަ މަސައްކަތްތަކެއް ވަނީ ރޭވިފައެވެ.

"އަޅުގަނޑުމެން ބޭނުންވަނީ މަގޭ ހުޅުމާލެ މިޝިއާރުގެ ދަށުން އެއީ މަގޭވެސް ހުޅުމާލެއޭ ސާފުތާހިރު ރަނގަޅު މާހައުލެއްގައި ދިރިއުޅޭ ބަޔަކަށް ހެދި އަޅުގަނޑުމެންގެ ދަރިންނަކީވެސް އެންމެ ރަނގަޅު ގޮތުގައި ބޮޑުވެގެންދާ މާހައުލަކަށް ހުޅުމާލެ ބަދަލުކުރުން" ޒުހައިރު ވިދާޅުވިއެވެ.

ހުޅުމާލެއަކީ ކުނިބުނިން ސާފުވެފައިވާ ތާހިރު ތަނަކަށް ހެދުމަށް މި ކެމްޕޭނުގެ ދަށުން ކުރިއަށް އޮތް ތަނުގައިވެސް ތަފާތު ސަރަހައްދުތަކުގައި ސާފުކުރުމުގެ މަސައްކަތްތައް ކުރިއަށް ގެންދިއުމަށް ވަނީ ރާވައިފައެވެ.