ހިމާޔަތްކޮށްފައިވާ ހިޖުރަވެރި ދޫނި ހިފައި ވިއްކާ ފަރާތްތަކުގެ މަޢުލޫމާތު ދިނުމަށް އެދިއްޖެ

ރާއްޖެއަށް ހިޖުރަކުރާ ހިމާޔަތްކޮށްފައިވާ ދޫނި ހިފައި ގަނެވިއްކާ ފަރާތްތަކުގެ މަޢުލޫމާތު ހިއްސާކޮށްދިނުމަށް އެންވަޔަރަންމަންޓަލް ރެގިއުލޭޓަރީ އޮތޯރިޓީން އެދިއްޖެއެވެ.

އިރުވައި މޫސުމަކީ ދުނިޔޭގެ އެކި ކަންކޮޅުތަކުން ގިނަ ބާވަތްތަކުގެ މޫސުމީ ދޫނި ރާއްޖެއަށް ހިޖުރަކުރާ ދުވަސްވަރެކެވެ. ތިމާވެށި ރައްކާތެރިކޮށް ދެމެހެއްޓުމާ ބެހޭ ޤާނޫނުގެ ދަށުން ހެދިފައިވާ ގަވާއިދުގެ ދަށުން މި ދޫނިތައް ހިމާޔަތްކޮށްފައިވާއިރު، އެ ގަވާއިދުގެ 17 ވަނަ މާއްދާގެ ދަށުން އެ ދޫނިތައް ހިފައި ގެންގުޅުން ވަނީ މަނާކޮށްފައެވެ.

އެ އޮތޯރިޓީން ބުނީ ކޮންމެ އަހަރަކު ވެސް މި ދުވަސްވަރާ ދިމާކޮށް ހިޖުރަކުރާ ގިނަ ބާވަތްތަކެއްގެ ދޫނި މަޅިފަތި ޖަހައި ހިފައި، ފިޔަ ކޮށައި، ކޮށީގައި ބަންދުކޮށް ގެންގުޅޭ ކަމަށެވެ. އަދި ވިޔަފާރީގެ ގޮތުގައާއި އޮޅުދޫނީގެ ގޮތުގައި ވެސް ހިފައި ގެންގުޅޭކަން ފާހަގަކުރެވިފައިވާ ކަމަށެވެ. މީގެ އިތުރުން 2025 ވަނަ އަހަރު އެ އޮތޯރިޓީން ހެދި ދިރާސާއަކުން ރާއްޖެއަށް ހިޖުރަކުރާ ދޫނީގެ ޢަދަދު މަދުވަމުންދާކަން ފާހަގަކުރެވިފައިވާ ކަމަށް ވެސް ބުންޏެވެ.

މިފަދަ ޢަމަލުތަކަކީ ރާއްޖެއިން ބައިވެރިވެފައިވާ ކޮންވެންޝަން އޮން މައިގްރޭޓަރީ ސްޕީޝީޒްއާ ޚިލާފު ޢަމަލުތަކެއް ކަމަށާއި، އެ މުޢާހަދާގެ ދަށުން ހިޖުރަކުރާ ދޫނިތަކަށް ރައްކާތެރިކަން ފޯރުކޮށްދިނުމަކީ ރާއްޖޭގެ ޒިންމާއެއް ކަމަށް އެ އޮތޯރިޓީން ބުނެފައިވެއެވެ. ރާއްޖެއަށް ހިޖުރަކުރާ ދޫނީގެ ސަބަބުން ވެށީގެ މުއްސަނދިކަމަށް ލިބޭ ފައިދާތަކަށް ވެސް މިކަމުން ހުރަސް އެޅޭ ކަމަށް ބުންޏެވެ.

އެ އޮތޯރިޓީން ވަނީ މިފަދަ ޢަމަލުތައް ކުރާ ފަރާތްތަކުން އެ ކަންކަމުން ދުރުހެލިވެ ހިފާފައިވާ ދޫނިތައް ދޫކޮށްލުމަށް އަންގައިފައެވެ. ގަވާއިދާ ޚިލާފަށް ދޫނި ހިފައި ގެންގުޅެ ގަނެވިއްކާ ފަރާތްތަކާ މެދު ފިޔަވަޅު އަޅައި ޖޫރިމަނާ ކުރެވޭނެ ކަމަށް ވެސް ހާމަކޮށްފައިވެއެވެ. އެފަދަ ފަރާތްތަކުގެ މަޢުލޫމާތު ހުށަހަޅާއިރު ދޫނި ގެންގުޅޭ ނުވަތަ ހިފާ ފަރާތާއި، ހިފައި ގެންގުޅޭ ތަންތަނާއި، ދޫނީގެ ބާވަތްތަކާއި، ގުޅުން ހުރި ފޮޓޯ އަދި ވީޑިއޯ ހިމެނުމަށް އެ އޮތޯރިޓީން އެދިފައިވެއެވެ.