އެމްޓީސީސީގެ ޓެކްސީ އެޕް ހެކެއް ނުކުރޭ؛ މަޢުލޫމާތު ލީކުކުރީ މުވައްޒަފެއް

މާލެ ޓެކްސީ ލައިން ޚިދުމަތުގެ އެޕް ބޭރުގެ ބަޔަކު ހެކު ނުކުރާ ކަމަށާއި ސިސްޓަމުގެ މަޢުލޫމާތު ލީކުކުރީ އެ ކުންފުނީގެ މުވައްޒަފެއް ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނެފިއެވެ.

އެ ކުންފުނިން ނެރުނު ނޫސް ބަޔާނުގައި ބުނީ ޓެކްސީ އެޕް ހެކުކުރި ކަމަށް ދެކެވޭ ވާހަކައަކީ ދޮގެއް ކަމަށެވެ. އެތެރޭގެ ތަޙުޤީޤުން ހާމަވެފައިވާ ގޮތުގައި ބެކްއެންޑް ޑޭޓާބޭސް ސިސްޓަމަށް ބަދަލު ގެނެސް ސްކްރީން ޝޮޓް ނެގުމަށްފަހު މަޢުލޫމާތު ބޭރުކޮށްލީ އެ ކުންފުނީގައި މަސައްކަތްކުރާ މުވައްޒަފެކެވެ. އެމްޓީސީސީން ފާހަގަކުރި ގޮތުގައި އެ މުވައްޒަފު ކުންފުނީގެ ހުއްދައެއް ނެތި މި ޢަމަލު ހިންގީ ޒާތީ އަދި ސިޔާސީ ބޭނުމެއް ފުއްދުމުގެ ނިޔަތުގައެވެ.

ޑޭޓާބޭސް ސިސްޓަމަށް ބަދަލު ގެނައިކަން ކުންފުނީގެ އައިސީޓީ ނެޓްވޯކް ސެކިއުރިޓީ ޓީމަށް ފާހަގަވުމާ އެކު ވަގުތުން ސިސްޓަމް ބަންދުކޮށް ސެކިއުރިޓީ ލޮކްޑައުންއަކަށް ގެންގޮސްފައިވާ ކަމަށް އެ ބަޔާނުގައި ބުނެފައިވެއެވެ. އަދި ކުންފުނީގެ ސާވާ އާއި ޓެކްސީ ލައިންގެ ބެކްއެންޑް ސިސްޓަމް ރޭގަނޑު 11:30 ގައި ރައްކާތެރިކަމާ އެކު ރީސްޓޯ ކުރެވިފައިވާ ކަމަށް ވެސް އެމްޓީސީސީން ބުނެފައިވެއެވެ.

މި ކަމުގައި ޝާމިލުވާ މުވައްޒަފު މިހާރު ވަޒީފާގެ ޒިންމާތަކުން އެކަހެރިކޮށްފައިވާ ކަމަށާއި ކުންފުނީގެ ގަވާއިދުތަކާއި އުސޫލުތަކުގެ ތެރެއިން އެންމެ ހަރުކަށި ފިޔަވަޅު އެ މީހާއާ މެދު އަޅާނެ ކަމުގެ ޔަޤީންކަން އެމްޓީސީސީން ދީފައިވެއެވެ. އެ ކުންފުނިން ބުނީ މި ފަދަ ޢަމަލުތަކުގެ ބޭނުމަކީ "ކުންފުނިން އެތައް އަހަރެއްގެ ބުރަ މަސައްކަތުން ހޯދާފައިވާ ރައްޔިތުންގެ ލޯތްބާއި އިތުބާރު އަދި ރީތި ނަން ކިލަނބުކުރުން" ކަމަށެވެ.

ކަސްޓަމަރުންނަށް މާލެ ޓެކްސީ ލައިންގެ ޚިދުމަތް ހޯދުމުގައި އެއްވެސް ދަތިކަމެއް ކުރިމަތި ނުވާނެ ކަމަށް އެމްޓީސީސީން ބުނެފައިވާ އިރު ކަސްޓަމަރުންނާއި ހިއްސާދާރުންގެ ޙައްޤުތައް ޙިމާޔަތްކުރުން މަތީ ދެމި އޮންނާނެ ކަމުގެ ޔަޤީންކަން ވެސް އެ ކުންފުނިން ދީފައިވެއެވެ.