އާޖިލްގެ ހެޓްރިކާ އެކު ޑްރީމުން، ކަންމަތި ކޮޅަށް ހަތް ގޯލް ޖަހައިފި

މިހާރު ކުރިއަށްދާ ކުޑަހުވަދޫ ބޮޑު ޢީދު ފުޓްސަލް ޗެލެންޖް 1447 ގެ ގްރޫޕް 2 ގައި ރޭ ކުޅުނު މެޗުގައި ޑްރީމް އެފްސީ އިން ގުޅުން ކަންމަތި އެސްސީ ކޮޅަށް ހަތް ގޯލް ޖަހައި ހަމަޖެހިލައިފިއެވެ.

ދ. ކުޑަހުވަދޫ އަކިރެޔެރެ ފުޓްސަލް ގްރައުންޑުގައި ކުޅުނު މި މެޗު ޑްރީމުން ކާމިޔާބުކުރީ 7-0 ގެ ނަތީޖާ އަކުންނެވެ.

މި މެޗުގެ އެންމެ ފާހަގަކޮށްލެވޭ ކުޅުންތެރިޔަކީ އަހުމަދު އާޖިލް އެވެ. އާޖިލް ވަނީ މެޗުގައި ހެޓްރިކް ފުރިހަމަކޮށް ޑްރީމް އެފްސީގެ ކާމިޔާބީގައި މުހިންމު ދައުރެއް އަދާކޮށްފައެވެ. މީގެ އިތުރުން ޒާން ވެސް ވަނީ ދެ ލަނޑު ޖަހައި ޓީމަށް މުހިންމު ޙިއްސާއެއް ވެދީފައެވެ. ޑްރީމް އެފްސީގެ އަނެއް ދެ ގޯލް ކާމިޔާބުކޮށްދިނީ ޝަނީމް މޫސާ އާއި އަހުމަދު ރިފާން އެވެ.

މެޗުގެ މޮޅު ކުޅުންތެރިޔާގެ މަޤާމު ހޯދީ ހެޓްރިކް ހެދި އަހުމަދު އާޖިލް އަށެވެ.

މި މޮޅާ އެކު ޑްރީމް އެފްސީ ކުޅުނު ތިން މެޗުން ލިބުނު ހަ ޕޮއިންޓާ އެކު ގްރޫޕް 2 ގެ ދެވަނައިގައި އެޓީމް ހަމަޖެހިލިއިރު، މެޗުން ބަލިވި ގުޅުން ކަންމަތި އެސްސީ ވަނީ ތާވަލްގެ ތިންވަނައަށް ވެއްޓިފައެވެ. މި ގްރޫޕްގެ އެއްވަނައިގައި 9 ޕޮއިންޓާ އެކު އޮތީ ރުއްދަށް އެސްސީ އެވެ.