ޓެކްސް ނެގޭ ދާއިރާ ފުޅާކުރުމުގެ ބިލަށް މަޖިލީހުގައި މެންބަރުންގެ ތާއީދު ލިބިއްޖެ

މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް 25 އިސްލާހެއް ހިމެނޭ ބިލެއް ރައްޔިތުންގެ މަޖިލީހަށް ހުށަހަޅައި އެ ބިލުގެ އިބްތިދާޢީ ބަހުސްގައި ގިނަ މެންބަރުން ތާއީދު ފާޅުކޮށްފިއެވެ.

ކުޅުދުއްފުށި އުތުރު ދާއިރާގެ މެންބަރު މުޙައްމަދު ދާއޫދު ހުށަހެޅުއްވި މި ބިލާ ގުޅޭ ގޮތުން އެ މެންބަރު ވިދާޅުވީ ޓެކްސް ނެގުމުގެ ނިޒާމު ވޭތުވެދިޔަ 10 ވަރަކަށް އަހަރު ތެރޭ ހުރީ ފުރިހަމަ ނުކުރެވި ކަމަށެވެ. ފާއިތުވެ ދިޔަ ތަނުގައި ޓެކްސް ރޭޓަށް ބަދަލު ގެނެވުނު ނަމަވެސް މި ފަހަރު ހުށަހެޅި ބިލުގެ މައިގަނޑު ބޭނުމަކީ ޓެކްސް ނެގޭ ދާއިރާ ފުޅާކޮށް ބޭރުގެ ފަރާތްތައް އެ ނިޒާމުގެ ތެރެއަށް ގެނައުން ކަމަށް މެންބަރު ވިދާޅުވިއެވެ. އެ ގޮތުން 2011 ވަނަ އަހަރު ފަތުރުވެރިކަމުގެ ދާއިރާއިން ޓެކްސް ނަގަން ފެށުމާއި 2012 ވަނަ އަހަރާއި 2023 ވަނަ އަހަރު ގެނައި ބަދަލުތަކަށް ބިލް ހުށަހެޅުއްވި މެންބަރު އަލިއަޅުއްވައިލެއްވިއެވެ.

"މިއީ އެންމެ ފަހުގެ އެންމެ ހަރުދަނާ ބަދަލަށް ވެގެންދާނެ. ކުރިން ގެނެވުނު ބަދަލުތަކުން ޓެކްސް ރޭޓަށް ބަދަލުގެނައިނަމަވެސް މި އިސްލާހަކީ ޓެކްސް ބޭސް ނުވަތަ ޓެކްސް ނެގޭ ދާއިރާ ފުޅާކޮށް ބޭރުގެ ފަރާތްތައް މި ނިޒާމުގެ ތެރެއަށް ވެއްދުމަށް ގެނެވޭ އިސްލާހެއް." މެންބަރު މުޙައްމަދު ދާއޫދު ވިދާޅުވިއެވެ.

ފުނަދޫ ދާއިރާގެ މެންބަރު މުޙައްމަދު މަމްދޫޙް ސިފަކުރެއްވީ މިއީ ޓެކްސް ނިޒާމަށް މިހާތަނަށް ހުށަހެޅުނު އެންމެ މުހިންމު އިސްލާހުގެ ގޮތުގައެވެ. މިއީ ރޭޓަށް ގެންނަ ބަދަލެއް ނޫން ކަމަށާއި އިޤްތިޞާދީ ގޮތުން ރައްޔިތުންނަށް ފައިދާ ކުރާނެ ބަދަލެއް ކަމުގައި އެ މެންބަރު ވިދާޅުވިއެވެ.

"ރާއްޖެގެ ރިސޯސްޓައް ބޭރުގެ ފަރާތްތަކުން ބޭނުން ކުރިކުރުމުން ދިވެހިންނަށް ފައިދާއެއް ނުވެ އޮތް އޮތުން މި އިސްލާހުތައް ފާސްވެ މިއަށް އަމަލުކުރެވުމާއި އެކު ނިމުމަކަށް އަންނާނެ." މެންބަރު މުޙައްމަދު މަމްދޫޙް ވިދާޅުވިއެވެ.

ހަމައެއާ އެކު އައްޑޫ ހުޅުދޫ ދާއިރާގެ މެންބަރު މުޙައްމަދު ޝާހިދު ވިދާޅުވީ ރާއްޖޭގެ ރަށްތައް ބޭނުންކޮށްގެން ވިޔަފާރިކުރާ ނަމަ އެ ކަމުން ދިވެހިންނަށް ލާބަ ލިބެން ޖެހޭ ކަމަށާއި މި ބިލުން އެ ކަން ޙާޞިލުވާނެ ކަމަށެވެ. ބަހުސްގައި ބައިވެރިވެވަޑައިގެންނެވި ގިނަ މެންބަރުން ފާހަގަކުރެއްވީ ފަތުރުވެރިކަން ކުރިއެރި ނަމަވެސް ޓެކްސް ނިޒާމުގައި ހުރި ނިޒާމީ އުނިކަންތައް ސަބަބުން ރައްޔިތުންނާ ހަމައަށް އެކަށީގެންވާ ފައިދާ ނުފޯރާ ކަމަށެވެ. މި ބިލް އިބްތިދާޢީ ބަހުސް މަރުޙަލާ ނިމުމުން ދެން ކޮމިޓީ މަރުޙަލާއަށް ދާނެއެވެ.